РЕЖИССЕР ЖӘНЕ ЖАҢАШЫЛДЫҚ
«Елу жылда ел жаңа» дегенді айтқан қазақ жаңару уақытының жартысын еңсерді. Ширек ғасыр ішінде мемлекеттің әр саласы әр қырынан жаңарды. Ел театрлары да тәуелсіздіктің тұмарындай тарихи қойылымдарды халыққа тарту етіп, мемлекетшіл сананың қалыптасуына едәуір ықпал етті. Біз бүгін ел Тәуелсіздігінің 25 жылдығына орай театртанушылардан режиссурадағы жаңалық пен жас режиссерлер туралы сөз қозғауды өтіндік.
- Кейінгі жылдары еліміздің театрларындағы режиссерлер жұмысынан соны жаңалық байқадыңыз ба? Қазақ режиссерлері әлемдік үрдіске қаншалықты ілесіп жүр?
- Тәуелсіздік жылдары қалыптасқан жас режиссерлер қатарына кімдерді жатқызар едіңіз? Олар сіздің ойыңызша несімен ерекшеленеді?
Амангелді МҰҚАН,
театртанушы
РЕЖИССЕРГЕ КЕРЕГІ – БІЛІМ МЕН ІЗДЕНІС
- Театрдың келбеті мен көркемдік бағыт-бағдарын режиссер айқындайтын заман туғанына бірнеше жыл болды. Қазақ театрын әлемдік театрдың көшінен қалдырмай жетелейтін де, бұра тартқан бағытын түзейтін көшбасшысы да – режиссерлер қауымы.
Әлемдік көшке ілесу мәселесінде салыстырмалы түрде қарасақ, орта, жас буын режиссерлердің белсенділігі сезіледі. Десек те, шабандап қалған тұстарымыз да жетерлік. Соны бағыттағы театр жанрларын игеруде бүгінгі жастар қажет ететін спектакльдер қою кемшін. Әлемдік, ұлттық классикаға айналған драматургиялық туындыларды соны режиссуралық көзқараспен сахналау терең білім мен үлкен ізденісті талап етеді. Режиссура – қара күш пен қажыр-қайратқа көне бермейтін жұқа да нәзік материя. Ол білімділік пен біліктілікке, ұшқыр қиялға негізделген суреткердің интеллектуалдық деңгейін байқатады. Мұндайда режиссураға бет бұрған жастарды дайындау мәселесі туындайды. Шала піскен қауын секілді білімі азын-аулақ жастарымыздың көргенінен әріге аса алмай жүргені осының айғағы. Олардың кәсібилігін арттыруда бірер айлық курстарға жіберу мәселені шешпейді.
Соңғы жылдары режиссерлер әлемдік классикамен бірге қоғамның өзекті мәселелерін көтерген заманауи драматургияға көбірек назар аударуда. Режиссер жұмысының екінші бір қыры – әлемдік деңгейдегі фестивальдерде, театр форумдарында өнер көрсетуі мен танымал болуына келер болсақ ойланатын жәйттер бар. Еуропалық деңгейдегі немесе көрші Ресейдегі Чехов атындағы фестиваль өзге көп фестивальдерден әлдеқайда ерекше. Режиссерлеріміздің жұмыстары осындай шетелдік танымал фестивальдерге шақырту алып, сондай деңгейі биік фестивальдердің жүлдегері атанса, біз үшін үлкен жаңалық, мол жетістік болмақ.
- Тәуелсіздік кезінде режиссураға біраз жаңа буын талантты режиссерлер легі келді. Қазақ театрының халықаралық аренадағы жетістіктері мен жеңістері сол жас жігіттер мен қыздардың еңбегі. Бұл бағытта Астана мен Алматыға шоғырланған ірі театрлардың және облыстық тетарлардағы шығармашылық ұжымдарда жұмыс істейтін, республиканың түкпір-түкпіріндегі театрларда спектакльдер қойып жүрген режиссерлер: Нұрлан Жұманиязов, Әлімбек Оразбеков, Болат Ұзақов, Алма Кәкішева, Гүлсина Мерғалиева, Асхат Маемиров, Мұқанғали Томанов, Алена Қабдешеваларды айтамыз. Өмірден ерте озған екі талантты режиссерлер Қайрат Сүгірбеков пен Рүстем Есдәулетовті де осы жерде атап кеткеніміз абзал. Режиссураға жаңа леп, соны ізденіс алып келген олар бойындағы барын толық бере алмай өмірден өтті.
Әр түрлі деңгейдегі театр бәйгелерінен жүлделі орын алып, халыққа таныла бастаған жас буын режиссерлер де бір шоғыр. Олардың қайсысы уақыт сынына, мамандықтың қиындығына төтеп беріп, қазақ театрын алға қарай дамытатынын уақыт көрсетер. Ауызға іліне бастағандарын толық болмаса да тізбелесек олар: Болат Әбдірахманов, Әлия Баймаханова, Дина Жұмабаева, Ерік Нұрсұлтан, Еслям Нұртазин, Жұлдызбек Жұманбай, Ерлан Кәрібаев, Дәурен Серғазин. Бұлардың бәрі жастар, кәсіби білімі бар, қазақ театрында өзіндік орнын табуға талпынысы бар. Қазақ театрының бүгіні мен ертеңі осы жастардың қолында деп білемін.
Әсия БАҒДӘУЛЕТҚЫЗЫ,
театртанушы
КӨРЕРМЕН ЖАҢАЛЫҚҚА ДАЙЫН ЕМЕС
Жаңалық жоқ деуге келмейді, бар деуге де келмейді. Өйткені, әр қойылымда соны ізденістер, кішігірім жаңалықтар бар, кейбір қойылымдардың махаббатсыз түзіліп жүргенін де байқаймыз. Бірақ құбылыс деңгейіне көтерілген стиль, бет-бейне, позиция деңгейіне шыққан жаңалықтың жоқтығы анық. Алыс-жақын шет елден келіп жатқан режиссерлердің арасында тапсырыс берушілерін жерге қаратпайтын режиссерлер бар. Мысалы, литвалық Йонас Вайткус Әуезов сахнасында Иран Ғайыптың «Қорқыттың көрін» табысты сахналады, саха режиссері Сергей Потапов Қуанышбаев театрында А.Чеховтың «Шие бағын», Атырау театрында Ә.Кекілбаевтың «Шыңырауын» қызықты етіп қойды. Әлемдік үрдіске қаншалықты ілесіп жүргеніміз әлемдік үрдіс деп нені айтуға да байланысты. Фестивальдерде, шет елге шыққанда байқайтынымыз, Түркия, Тәжікстан, не Әзірбайжан сияқты елдердің театрларынан қазақ театрының кәсіби деңгейі бір бас жоғары. Ал әлемнің үздік үлгілері ретінде Еуропа мен Ресей театрларына қарасақ, біз олардан басқаны айтпағанда, жарық беру, сценографияның өзінде біраз артта қалып келеміз. Мейерхольдтардың кезінде прожекторды пайдаланып, кинодағыдай «ірі план» жасау және просцениумды қолдану сонылық болса, қазір кейіпкерлер аспаннан түседі, киноның монтажын, киноның көркемдік құралдарын барынша пайдаланады. Мысалы, британдық Донмар театрының «Кориоланында» әйгілі актер Том Хиддлстон он бес минут бойы аяғынан салбырап ілініп тұрып ойнайды. Демек, қазіргі театр актердің физикалық мүмкіндігін сынайды. Көптеген шетел театрларында сахна деген төрт емес, бес, алты өлшемді кеңістікке айнала алатынын көріп жүрміз. Бір мезетте бір оқиға емес, сахна тереңдігінде бір-біріне іркесе-тіркесе екі, үш оқиға жүріп жатады. Қиялың жетсе, театр сахнасының мүмкіндігі шексіз. Сол жағынан біз әлі шабандаумыз. Сосын бізде ізденістер бар. Бірақ көбінде жаңалық жаңалық үшін, қыр көрсету, сән үшін, өзін бөлектеу үшін. Ол ішкі қажеттіліктен шығу керек, режиссердің ойлау, дүниені қабылдауының өзіндегі «біртүрлілік», талғам, интеллект сол жаңалықты талап етуі керек. Мысалы, Петербургте Ресей театрының авангарды Юрий Бутусовтың спектакльдерін бірнеше күн қатарынан тамашалағанда, сондай «табиғи» жаңашылдықты көрдік, орыс сыншыларының оны «ХХІІ ғасырдың театрын жасайды» деген анықтамасымен келіспеуге лажымыз қалмады. Ол сахнаны ғана емес, көрерменді де өзгерткісі келеді. Бізде режиссура қандай жас болса, көрермен де сондай жас. Бізде спектакль басталарда, облыстық театрлардың бірінде «Спектакль кезінде шыңғыруға, айғайлауға, ысқыруға болмайды» дегенді естідік. Демек, әлі де көрерменді мәдениетке тәрбиелей алмай жатырмыз. Ал Питерде көрерменді мәдениеттің құрсауынан шығара алмай жатыр. Спектакль басталарда біздегідей «Құрметті көрермендер, тырп етпей отырыңдар» демейді, «Спектакль ұнамаса, шығып кете беріңіздер, іштеріңіз пысса, фойеге барып шампан ішіп келіңіздер» дейді («Ленсоветтің» «Кабаре Брехт» қойылымы). «Макбет. Кино» қойылымында спектакльдің төртінші сағатына келгенде аяқ астынан клуб музыкасы ойнап, көрермендер де (әрине, дайындалған статистер ғой) ортаға шығып билей бастайды. Билеу жаңалық емес, мәселе басқада. Мәселе көрермен мен сахнаның ара-қатынасын өзгертуге тырысуда, өйткені енді біраз уақытта театрға басқа зал керек болады, көрерменнің отыратыны сірескен қатар орындықтар емес, дөңгелек үстелдерді жағалай жайғасқан креслолар болуы мүмкін. Сюжеттен, жүйеден бас тартып, жаңа формалар тауып, есесіне түпкі мағынаға адал сондай спектакльдерді көргенде ізденіс туралы айтуға болады. Олар жасап жүрген жаңалыққа біздің режиссерлер де, актерлер де, көрермендер де әлі де дайын емес екенін аңдайсың. Бірақ Әзекеңнің кезіндегідей авангардта болмасақ та, қазіргі кәсіби деңгей, потенциалымыз ешкімнен сорлы емес екенін де баса айту керек. Жалпы, қазір театрлардың негізін ұстап тұрған көп режиссерлер осы кезде қалыптасты. Алматыдағы Жастар театрының көркемдік жетекшісі Мұрат Ахманов, Астанадағы Қуанышбаев театрындағы Әлімбек Оразбеков, Нұрлан Жұманиязов, Болат Ұзақов, т.б. Тәуелсіздік кезінде режиссер болып қалыптасты. Олардан кейін келген буын ретінде Гүлсина Мерғалиева, Мұқанғали Томанов, Асхат Маемиров, Ербол Жуасбек, олардың өкшесін басып өз жолын, өз қолтаңбасын іздеп жүрген Ерік Нұрсұлтан, Дина Байділдаева, Балтабай Нұрғалиевтардың есімін атауға болады. Жұлдызбек Жұманбай, Дәурен Серғазин сияқты актерлер режиссерлік қадамдарын жасауда. Аталған режиссерлердің бәрі бірдей емес, әрине. Мынау сұңғыла, мынау әлі ізденуі керек деп осы жерде бөліп жарып жату артық болады. Бірақ олардың қатарында дәстүрлі реализм бағытын ұстанатындар бар, сонымен бірге «белсенді режиссура», «шартты театрды» ұстын етуге тырысатындар бар. Ал бәріне ортақ ерекшелік әлемдік классикалық шығармаларға, кеңес кезінде жазылған қазақ драматургиясына жаңа көзқараспен келуі, жаңа заманға сай интерпретациялауы. Қ.Сүгірбековтің «Махаббат дастаны» (Ғ.Мүсірепов), Б.Атабаевтың «Қарагөзі» (М.Әуезов), Ә.Оразбековтің «Қараш-Қарашы» (Қ.Ысқақ), т.б. соған дәлел. Тарихи тақырыптар, мысалы, М.Томановтың «Жәңгір ханы» (Р.Отарбаев), М.Ахмановтың «Райымбек, Райымбегі!» (М.Мақатаев), Б.Ұзақов сахналаған «Кенесары Күнімжан», «Абылай ханның арманы» (Д.Рамазан) сияқты қойылымдар көркемдік деңгейі әр түрлі болғанымен, тарихи санамыз үшін күрес қазақ сахнасында да жүріп жатқанының айғағы. Әлемдік драматургиядан жаңа материал іздеп, көрерменнің керегіне жарауға тырысып жүргендер бар. Қалай болғанда да сахнада төңкеріс, жарылыс сезілмейді, Айвазовскийдің картиналарындағыдай адуын толқындар жоқ, қазіргі режиссурадағы жағдай шып-шып етіп ағып жатқан момақан өзенге көбірек ұқсайды.
Ақмоншақ АХМЕТ,
«Мәдениет» журналының редакторы
РЕЖИССУРА ЖҮЙЕЛІ ҚОЛДАУҒА ЗӘРУ
- Еліміз тәуелсіздік алған 25 жыл ішінде театр өнері бір орнында тұрып қалмағаны анық, аз да болса да ілгерілеушілік бар. Театр өнерінің дамуы режиссердің шығармашылық жұмысымен тығыз байланысты. Ә.Рахимов, Н.Жақыпбай, Ж.Хаджиев, Ә.Рахимов, А.Кәкішева, Б.Атабаев, М.Ахманов сынды бұл күнде аға буынға айналған режиссерлердің ізіне ілесіп келе жатқан олардың шәкірттері бар. Орта буын режиссерлердің қатарына Асхат Маемиров, Гүлсина Мерғалиева, Д.Жұмабаева сынды режиссерлерді жатқызуға болады. Бұған қоса, облыстық театрларда да Ә.Баймаханова, Абай Ділдә сияқты орта буын өкілдері бар.Өкінішке қарай, бұл режиссерлердің еңбектерін көруге мүмкіндік бола бермейді. Тәуелсіздік жылдары танылған бұл режиссерлер тарихи тақырыптар мен тарихи тұлғаларға байланысты жазылған пьесалардан гөрі психологиялық драмалар мен трагедия жанрындағы шетел классиктерінің туындыларын көбірек сахналағанын байқауға болады. Режиссурада өзіндік қолтаңбаларын байқатып үлгерген А.Маемиров пен Г.Мерғалиева қойған спектакльдер көптеген халықаралық және республикалық театр фестивальдерінде жүлделі орындарға ие болды.
- Т.Жүргенов атындағы Қазақ Ұлттық Өнер академиясы Қазақстандағы театр режиссерлерін дайындайтын бірден-бір жоғары оқу орны. Осы өнер ошағына 3-4 жылда бір рет театр режиссурасы курсына шәкірттер қабылданып, аға буын режиссерлерден тәлім алады. Режиссер мамандығына қабылданатын студенттер саны тым аз, олардың ішінде театр режиссерлығына ден қойып, сол жолда еңбек ететіндері аз. Бұл мамандық бойынша тәлім алған түлек ертеңгі күні бірден толымды спектакль қойып, танымал бола алмайды. Олардың өсіп-жетіліп, көрермен мен театртанушылардың назарына ілігуі үшін де уақыт керек. Сондықтан да жас режиссерлердің өсіп, қалыптасу кезеңдері алда деп ойлаймын. Ал қазіргі таңда екі-үш спектакль қойып, театрлар репертуарын өзіндік ізденістерімен толықтырып жүрген жас буын режиссерлеріміздің қатарында Е.Нұрсұлтан, Е.Нұртазин, Ж.Жұманбай мен соңғы кездері режиссураға ден қойып жүрген актер Ә.Ахметов те бар. М.Әуезов атындағы академиялық қазақ драма театрының ең жас режиссері Ерік Нұрсұлтан қойған «Қас-қағым», «Король Лир» қойылымдарын ерекше атауға болады. Еслям Нұртазин мен Жұлдызбек Жұманбай әр түрлі жанрдағы алуан тақырыптағы пьесаларға барып жүр. Бұл режиссерлердің мюзикл жанрындағы және балалар мен жастарға арналған қойылымдарын да көріп жүрміз. Әлде де ізденіс үстіндегі, өзін-өзі табу үстіндегі режиссерлардың шығармашылығы мен олардың ізденістері жайында кесіп-пішіп айтуға әлі ерте.
Драматургия саласы секілді театр режиссурасы дәл қазіргі уақытта жас режиссерлерге зәру. Ал оқу орнын жаңа бітіріп, шыңдалуға ниет еткен болашақ режиссерлерге жағдай жасап, олардың да көрінуіне мүмкіндік беруіміз керек. Қазақстандағы 50-ден аса театрларға жүйелі түрде жас мамандарды жіберіп, олардың шығармашылық жұмыстарын қадағалап отыруды министрлік қолға алуы керек. Олай етпесек, мәселенің түйткілі бүгін-ертең шешіле қоймайды.
Дайындаған
Назым ДҮТБАЕВА.