ӘУЕЗОВТІҢ ТУҒАН КҮНІНЕ ОРАЙ ТОЛҒАНЫС…
Ресей 2015 жылды Әдебиет жылы деп белгілеген еді. Ал 2016-ны Олар Киноға арнапты. Әдебиет жылында сан түрлі жиын-шара өтіп, үлкен істер атқарыла келіп, қорытындысы таң қаларлық болды. «Культура» телеарнасы Россияның 24, алыс-жақын шетелдің 10 қаласынан 1300-ге тарта оқырман Лев Толстойдың «Соғыс пен бейбітшілігін» оқыды. Мұғалімнен мұражай қызметкеріне, ғалымнан ғарышкерге, көше сыпырушыдан көрнекті жазушыға, саясаткерден сардарға дейін ұлы романды ұмытпағанын, керісінше оған деген ынта-ықыласы ерекше екенін аңғартты.
Әлібек БАЙБОЛ
Ұйымдастырушылардың көздегені – «Толстой арқылы Әлемге осыншама ұлан-ғайыр жердің иесі орыстың қандай мықты ұлт екенін көрсету» болыпты. Бұны – «бір оқпен екі қоянды бір-ақ ату» дейді. Бір жағынан, Әдебиет жылын жалаулатқан Ресей билігін қазіргі геосаяси жағдай алаңдатып тұрғаны шындық. Наполеон Бонапарттың «Қара құрлық» – Африка мен «Кәрі құрлық» – Еуропаны жаулап келіп, Россияны жеңе алмағаны кім-кім үшін де тарихи сабақ. Бүгіндері «Соғыс пен бейбітшілікте» айтылған Кутузовтың: «Жерімді қорғаймын, елімді аман алып қаламын!» – деген сөзін ормандай орыс жастары көп айтып жүр. Сол себепті, бұл афоризм саяси, патриоттық (кейде шовинистік) мәнге ие боп жатса, таңырқаудың қажеті жоқ. Арғы жағында: «Көрдіңдер ме, бастан небір уақиғалар, соғыс пен зобалаң өтті…» деген емеурін бар. Ресей мен Түркия арасындағы қақтығыс (Орыс-түрік соғысы) немесе Ресей мен АҚШ арасындағы текетірес («Қарулану жарысы») «тарих қайталанатынын» дәлелдесе керек. Осы орайда, Путин бастаған Россия билігі дәл қазіргі тұста рухты көтеріп, жігерді жану үшін Толстой аса қажет екенін ұғып отыр. Кейде көрсоқыр Саясат Әдебиеттің көркемдік-эстетикалық құндылығын, нәрін, сөлін, күш-қуатын ескермейді. Әдеби-мәдени жобаның ғаламаттығын былай қойғанда, Батыс Еуропа әдебиеті ұстаз тұтқан Толстой эпопеясын қалқан етіп ұстау қаншалықты дұрыс шешім екенін Уақыт қана айта алады.
«Соғыс пен бейбітшілікті» бүкіл ел боп оқу үрдісі, шыны керек, көңіл қуантады. Бұрындары радиодан повесть, әңгіме, радиоспектакль тыңдап келген әдебиетсүйер қауым үшін бұл үлкен тарту болды. Рейтингі бойынша «Первый канал» мен «Россия 1»-ден кейінгі орынға орныққан «Культура» арнасындағы «Роман оқимыз» атты айдары жандана түсетінге ұқсайды. Енді келешекте Михаил Шолоховтың «Тынық Дон», Федор Достоевскийдің «Ағайынды Карамазовтар» мен Николай Гогольдің «Өлі жандарын» оқу жоспарда бар екен…
Иә, дерсің. Ішіңде бір қызғаныш оянады екен. «Жақсыдан үйреніп, жаманнан жиренетін» әдетке сай, біз де қойын-дәптерге біраз нәрсе түртіп алсақ артық болмас еді ғой. «Ит үреді, керуен көшедінің» керімен, талай ой айтылғанмен орындалу жағы кемшін түсіп, бәрі-бәрі келіп шенеуніктің: «О жұмыстар атқарылып жатыр…», – деген жаттанды сөзімен тұйықталатыны бар. Оған құлақ та, Біз де, Сіз де, жалпы организм де үйренген. «Шартты рефлекс» деңгейіндегі дүние ғой. Сұрақ қойсаң болғаны, сақ етіп жауабың да дайын тұрмақ. 2016 жылдың 28 қыркүйегі – Мұхтар Әуезов, Шерхан Мұртаза мен Оралхан Бөкей сияқты жазармандардың дүние есігін ашқан күн.
Мектеп, лицей, колледж, университет қабырғасындағы қатып, сіресіп қалған «динозаврларды» академиялық құрсаудан алып шығып, қабырғалы қаламгерлерді елмен қайта таныстыру секілді игі бастаманы неге жүзеге асырып көрмеске?! Егер романды ауырсынсақ, көлемді әңгімеден, я повестен бастасақ, қайтеді?! Бұл әдебиетті ел арасында насихаттап, халыққа жол табудың бір формасы болар еді. Себебі, рухани дүние һәм мәдени мұрамен қаптаған қаулы-қарар қатарласқан осынау бір заманда заңғар жазушылардың аты тіптен аталмайтын болды. «Өз қазанымызда өзіміз қайнаған» деген сөз жиі айтылып жүргеніне, әне-міне дегенше 25 жыл болыпты. Тәуелсіздікке де 25 жыл! Зырғыған жүйрік пойыздай «алға» (!) ғана ұмтылудамыз, алайда бір сәт артқа қарап, барды бағалап, ұлт ұпайын түгендеп жүрген біреу болсашы… Осы күнге дейін не істелді? Негізгі сауал – осы. Мойындау керек, «Мәдени мұра» бағдарламасы аясында біраз дүние шықты. Оның қапталында қазақтың қаншалаған көне әдеби шығармалар, жоғалып барып қайта табылған авторлар мен тарихи жәдігерлер ортамызға оралуда. «Баласағұн кітапханасы», «Алтай-Ертіс кітапханасы» «Сырдария кітапханасы», «Қазыналы Оңтүстік», «Маңғыстау ақын-жазушыларының кітапханасы», «Ақтөбе кітапханасы» сияқты сериялар түсінген адамға аз олжа емес. Кейде жекелеген демеушілер, ал кейде мемлекет қолдауымен жарық көріп жатқан осы том-том жинақтар оқимын, білемін, ізденемін деген тек Алаш жұрты емес, өзге де қазақ дүниетанымымен танысқысы келген талапкер үшін үлкен қазына екені сөзсіз. Қош! Әр өңір өз жоғын түгендеп, бабадан қалған бар байлығын жинақтады. Құптарлық іс… Бірақ бұныңыз бірінші баспалдақ қана емес пе?! Енді сол барды өскелең ұрпаққа насихаттап, жалпыұлттық сипат алу үшін бір кешенді жоспар қажет-ақ. Мәдениет, әдебиет және өнер саласындағы азды-көпті жетістіктер спорт пен шоудың далдасында қалып қойып жүргені айтылып та, жазылып та жүр.
Библиографиялық көрсеткішке айналған, сөрелерде шаң басқан көптеген жазушыларды халыққа таныстырудың ұтымды жолын қарастырсақ деген ой бар. Орталық кітапханалар жүйесі ұйымдастыратын «Кітап-fest», «Book-кросинг» оқырманды тарту, қызықтырудың бір түрі ғана екенін ұмытпасақ екен. Әлеуметтік жағдайы төмендеу, билік те, басқа да назар аудара бермейтін саланың бірі – кітапхана. Бүгіндері Біз ол жаққа қандай мақсат-мұратпен баратынымыз айқындалып қалды. Ұстаз берген тапсырманы орындау, ескі бір тігінділерді қарау я болмаса бәзбіреудің тапсырмасымен баруға мәжбүрміз. Өз еркімен келіп, «рухани мұраға» ден қойып жүргендер аз болуы заңдылық та шығар, бірақ оқырман қатарының көбеюі ұлттық ұстанымға тікелей байланысты. «Интеллектуалды меншік», «ақыл-ой жемісі» секілді ұғым-түсініктер қара жұмыстан биік тұрғанда ғана балаңдықтан арылған, кез келген мәселеге Парасат биігінен қарағанда ғана шынымен де Ел деген атқа лайық боламыз. Ойсыздықтың арты опасыздыққа алып келетінін сан мысал табуға болады. Бұдан шығатын қорытынды, Қазақ елі «интеллектуалды қоғам» түзіп, өресі биік абзал азамат пен ақылына көркі сай азаматшаларды тәрбиелеудің мән-маңызы қалай артпақ? Сондықтан кітап пен оқырман, оқу мен тоқу, жазушы мен туынды секілді ауқымды дүние ұлттық сыпат алып, қолдауға ие болса деп армандап болдық. Енді тек нақты қадамдарға бару қажет. «100 қадам» сынды әдеби, мәдени, өнер саласына үлкен реформа керек-ақ.
Толстой Әлем, оның ішінде орыс жұрты үшін қаншалықты бағалы болса, қазақ үшін де Әуезовтің орны ерекше. «Абай жолы» роман-эпопеясын бүкіл қазақ боп жабылып оқымасақ та, жаңа бір формат шеңберінде, жаңа бір форма тауып жүзеге асыруға болады ғой. Бұндай бір бастама «Сөз өнерінен» ажырай бастаған халықты серпілтіп, құлықсыздық, немкеттілік, бей-жайлық сеңін бұзып, Ұлы шөлді бір басар ек. Қазақ әдебиеті дегенде ауызға алдымен Абай, кейін сол Абай мен оның дәуірінің көркемдік полотносын жасаған Әуезов ілігетіні бар. Екі алып арқылы Қазаққа жақындаудың жолын тауып, Қазақ жанына үңілсек қана, алға жылжи алатынымызды ұғынсақ екен. 28 қыркүйекте Мұхтар Омарханұлы Әуезовтің туған күніне ұлт, мемлекет, дербес ел ретінде қандай сый жасай алдық екен, не болса да «іште ғой»…