ІСКЕРЛІК ТАҚЫРЫП
немесе ҚАРЖЫ, ЭКОНОМИКА, БИЗНЕСТІ ҚАЗАҚША «СӨЙЛЕТУДІҢ» ЖОЛЫ
Ербол АЗАНБЕК,
«Qazaq Media Group» компаниясының директоры
Алматыда «Іскерлік журналистика мектебі» жұмыс істей бастады. Қырықтан аса жас журналисті тегін оқытуды қолға алған жобаның мақсаты – қаржы, экономика, бизнес тақырыбында жазатын студенттерді оқыту. Қазақстанда салалық журналистиканы дамытуға ниетті жоба сәрсенбіде алғашқы дәрісін өткізді.
– Ербол, бұл жобаны қолға алудағы мақсат не?
– 2013 жылдан бері банк саласында қызмет етемін. Банкке алғаш келген кезде қазақ тілінде қаржы тақырыбында жазатын журналистер аз екенін ұқтым. Тіпті, бұл тақырыпта қазақ тілінде мәселе қозғайтын журналист жоқ десе де болады. Бір ғана мысал: банкке журналистер тарапынан орыс тілінде күніне 6 сауалхат келіп түссе, қазақ тілінде жылына 6 сауалхат әрең келеді. Оқырманға қаржы өнімдерін қазақша түсіндіріп, бағыт беретін материалдар аз. Бізге кейде ауылдардан адамдар өте қарапайым сұрақпен хабарласады. Өткенде бір ақсақал 300 шақырым жерден ат арытып келгендегі бізге қойған сауалы: «Несие алып, төлей алмай қалсам не болады?» дегенге саяды. «Газеттің бәрінде несие жаман, алмаңдар дейді. Менің несие алмасқа амалым жоқ. Бірақ ертең оны төлей алмай қалсам не болады, оны ешкім жазбайды, тек осыны ғана білу үшін ауылдан келдім», – дейді қария. Егер қаржы, несие тақырыбындағы ақпарат қазақ БАҚ-да жиі жарияланып тұрса, қария алыс елдімекеннен Алматыға сандалмас еді ғой.
Елімізде 5 млн адам несие алған. Оның 1 млн-ы проблемалық несие. Бәлкім, қаржы сауаттылығы, несие алу мен оны қайтарудың жолдары жайлы дұрыс ақпарат болса, проблемалық несие мәселесі аз болар ма еді?! Дәл қазір біздің қоғамға қаржылық сауаттылық, қаржыға қатысты ақпарат маңызды болып тұр. Оның жоқтығынан, түсінбеушіліктен қоғамда қаржы, экономика, бизнеске деген сенім азайды.
Мемлекет шағын және орта бизнеске көңіл бөле бастады. Бірақ ары-бері сабылып, не істерін білмей жүрген адамдар тағы көп. Көпшілігі ауылды жердің халқы. Бұның да басты себептерінің бірі – қаржы, бизнес тақырыбында қазақ тілінде ақпараттың жоқты-ғы дер едім.
БАҚ қаржы тақырыбын қаузаудың орнына, тек жарнаманы жариялағысы келеді. Қаржы ұйымдары мен мемлекет тарапынан бизнеске қолдау білдіруші операторлар өзінің тұйық әлемінде жүр. Олар халыққа ақпарат жетіп жатыр деп ойлауы да бек мүмкін. Ақпарат аударма түрінде, қазақ қоғамына түсініксіз тілде жеткендіктен, қаржы, бизнес құрылымдарында БАҚ-пен байланыс дұрыс жолға қойылмаған деп айтуымызға негіз бар. Бұл тақырыпқа маманданған БАҚ та аз. Керісінше, рейтинг үшін әншілердің «бентли» алғаны, тойда төбелескені сияқты пайдасыз ақпарат көбейді.
2014 жылы ҚазҰУ-дың журналистика факультетінің студенттерін жинап, бұл мектепті пилоттық жоба ретінде аштық. Бір жылдан кейін оларды жұмысқа орналастыру қажет болды. Жоба жалғасын табуы үшін 7kun.kz ақпарат агенттігін құрып, оған 5 тыңдаушыны жұмысқа алдық. Жақында Жадыра Аққайыр есімді түлегіміз аталған сайтта бір жыл жұмыс істеген соң, «Айқын» газетінің экономика бөліміне тілші болып ауысты. Тағы үш тыңдаушыны Астанаға жаңа ашылып жатқан жобаға алып кетті. 7kun.kz бірқатар жүлделерге ие болды. Жас мамандарға сұраныс бар, қаржы, экономика, бизнес тақырыбында жазатын жас журналистер қажет, мектеп аясында басталған жобалар табысты болған соң, биыл «Іскерлік журналистика мектебін» үлкейтіп, қырықтан аса жас журналисті іріктеп алдық.
– Оларға қандай талаптар қойылады?
– Жоба келесі жылы жалғаспайды. Іскерлік тақырыпта жазатын елуге жуық жас журналисті дайындап, журналистикадағы сүрлеуін табуына көмектессек, соның өзі үлкен жетістік. Сондықтан биыл елуге жуық адамды іріктеуге барынша күш салдық. Алдымен Алматыдағы 8 жоғары оқу орнында болып, журналистика, филология, экономика мамандығының студенттерімен кездестік. Кейін 3 кезеңді іріктеу: әңгімелесу, анкета, эссе жазу арқылы үздіктерін таңдадық. Жалпы, 150 өтініш келіп түскен, біздің талапқа сай келген 75-ін іріктеуге шақырдық. Оның 41-ін таңдап алдық. Біздің мектепте оқитын студенттердің жалпы ортақ портреті мынандай: «ұлты – қазақ, жасы 20-да, журналистика факультетінің 3 курс студенті, орысша түсінеді, ағылшын тілін меңгеруде, nur.kz, tengrinews.kz сайттарын оқиды, Вконтакте, инстаграмм желілерінің тұрақты қолданушысы. Тіпті негізгі жаңалықты инстаграмнан оқиды. Көпшілігі тележурналист болғысы келеді. Журналистикада тәжірибесі жоқ. Мақала жазып көрмеген. Мультимедиалық өнімдерді мүлдем жасап көрмеген. Айына 3 кітап оқиды. Газет пен сайт журналисінің айырмашылығын білмейді».
Біздің мақсат – алдағы үш айда осы бейнені өзгерту. Шамамен 3 айдан кейінгі портет мынандай болса дейміз: «Қаржы саласында жазатын жас журналист ретінде таныла бастаған. Қаржы, экономика, бизнес тақырыптарында кемінде 25 материалы жарық көрген. Жаңалық, мақала, сұхбат, сараптама жаза алады. Аудиоподкаст, фоторепортаж, видеосюжет, инфографика және т.б мультимедиалық өнімдерді жасаудан хабары бар. Қаржы, экономика, бизнес тақырыптарында кемінде 30 кітап оқыған. Әлеуметтік желіде күнделікті шолып отыратын 10 жаңалық сайты бар. Қаржы, экономика, бизнес саласындағы жаңалықтардан хабардар. Банк өнімдерін түсініп, басқаларға түсіндіріп, талдап бере алады. Экономика, бизнес саласына қатысты негізгі түсініктерді, сарапшыларды біледі, талдап айта алады. Еліміздегі жетекші журналистердің барлығын таниды. Қазақ тіліндегі республикалық газеттерді біледі, оқиды. Жақсы журналист болуға сенімі бар. Тұрақты ізденетін, сайтта, газетте істеуге дайын тұлға».
– Мектеп тыңдаушыларына кімдер, қандай тақырыптарда дәріс оқиды?
– Бастапқыда бірден іскерлік тақырыптан дәрістер жүргізе бастаймыз деп ойлап едік. Алайда, жалпы жағдай біз ойлағандай болмады. Сондықтан студенттерді алдымен мотивациялық тұрғыдан дайындаймыз деп шештік. Алғашқы дәрісті сәрсенбі күні, шетелде білім алған, ірі компанияларда менеджерлік қызметте болған кәсіпкер, бизнес-тренер Олжас Сүлейменов «Журналист – көшбасшы болуы керек» тақырыбында өткізді. Бұл бағыттағы дәрістер жалғасады. Бұдан кейін журналистика негіздерін түсіндіреміз. Жаңалық жазудан бастап, сараптама, мультимедиалық өнімдер жасауға дейінгі жұмыстарды тәжірибелі журналистердің көмегімен үйретеміз. Кейінірек іскерлік журналистикаға көшеміз. Бұл ретте тыңдаушыларға «Даму» АҚ, «Бірыңғай жинақтаушы зейнетақы қоры» АҚ, Қазақстан қор биржасы, Silk Road Kazakh-Chinese Center of Cooperation, «ҚазМұнайГаз» АҚ, «ҚазТрансГаз» АҚ, Исламдық қаржы дамыту қауымдастығы, «Қазақстанның Тұрғын үй құрылыс жинақ банкі» АҚ, Алматы қалалық Статистика департаменті, Халық банкі – жалпы саны 30-дан аса қаржы, бизнес құрылымдарының басшылары дәріс оқиды,тәжірибелік сабақтар жүргізеді. Дәріс 3 ай бойы, аптасына 3 рет өтеді.
– Іскерлік журналистика мектебін аяқтаған студенттерден қандай нәтиже күтесіздер?
– Қаржы, экономика, бизнес күрделі сала екені түсінікті. Үш айда бәрін меңгерту мүмкін емес. Біздің мақсат – 3 айда осы саланың журналисі болуға ынталандыру, бастапқы ақпаратты беру, осы «әлеммен» таныстыру. Қаржы, экономика, бизнес тақырыбында ақпаратты қайдан, кімнен алу, ақпарат, мәліметті қалай өңдеу, саладағы өнімдерді біліп, ол туралы қалай дұрыс ақпарат тарату керек, т.б қажетті мәліметке қол жеткізу жайын айтамыз. Үш айдан соң барлық тыңдаушылар сертификат, мінездеме алады. Үш тыңдаушыны 7kun.kz сайтына штатқа, 5 тыңдаушыны штаттан тыс тілші қылып алсақ деп отырмыз. Қалған тыңдаушыларды да ұмытып кетпейміз. Бір жыл бойы олардың арасында іскерлік тақырыпқа айлық, тоқсандық конкурстар ұйымдастырып отырамыз. Оған қарастырған қаржылай жүлделер бар. Бұл оларға 3 ай бойы үйренген нәрсені ұмытып кетпеуге, ары қарай меңгеруіне септігін тигізуі тиіс. Және түрлі БАҚ-на тәжірибеден өтуге, жұмысқа тұруына мүмкіндік жасағымыз келеді. Бұл – жоба мақсаттарының бірі. Журналистика факультетін бітірген жастар көп жағдайда жұмыс таппай немесе редакцияларда ұзақ уақыт тәжірибеден өтіп жүреді. Көпшілігін «тәжірибең жоқ» деп кері қайтарады. Әрине, редакцияларға дайын маман керегі түсінікті. Егер жас маман өзі жаза алса, өзі мультимедиалық өнімдер жасай алса, өзі әлеуметтік желімен жұмыс істей алса, көшбасшылық қабілеті болса, мұндай проблема болмас еді. Қазір әмбебап мамандарға сұраныс бар. Біз жастарды осыған дайындап, журналистердің жаңа буынын қалыптастырсақ дейміз. Бұл бір шеті студенттерге пайдалы: оқиды, үйренеді, тәжірибеден өтеді, жұмысқа тұрады. Қазақ журналистикасында салалық журналистика дамиды. Оқырман үшін де тиімді: олар қаржы, экономика, бизнеске қатысты ақпарат ала бастайды. Қаржы, экономика, бизнес құрылымдары үшін тиімді тұсы – ақпараты халыққа дұрыс жете бастайды.
– Бұл жоба сізге не береді?
– Бала күннен журналист болуды армандадым. Мектеп бітіре сала халықаралық қатынастар мамандығы бойынша оқыдым. Екі жылдан кейін журналистика факультетіне қайта оқуға түстім. Қазақпарат агенттігінде тілші, «Қазақстан» РТК АҚ интернет жобалар редакциясында бас редактор болдым. Өзім оқыған журналистика факультетінде сабақ бердім. Журналистика бойынша 100-ге жуық тренингтерге қатыстым, өзім де түрлі тренингтер өткіздім. Банк саласына келген соң, қаржы саласы туралы ақпараттар қолымнан өтетін болды. Іскерлік журналистиканы дамыту керегін, бұл салада мәселе көп екенін түсіндім. Журналистикадағы, журналистік білім берудегі, қаржы саласындағы аздаған тәжірибем маған осы саланы дамыту керек деген миссия жүктеп тұрғандай көрінді.
– Жобаны кім қаржыландырады?
– Проблеманы көріп отырған, түсінген, қазақ журналистикасының дамуына көмектескісі келген демеуші бар. Жастардың болашағына инвестиция салғаны үшін ол кісіге алғысымыз шексіз. Әрине, қаражатсыз қандай жоба болсын, жүзеге асуы қиын. Сондықтан жобаны қаржыландыру үшін былтыр «Qazaq Media Group» компаниясын құрдым. Қазір бұл компания 7kun.kz ақпарат агенттігі, Рr және event шаралар ұйымдастырумен айналысады. Іскерлік журналистика мектебі де бар. Бірақ бұл – әлеуметтік жоба. Өйткені, табыс таппайды. Ақылы оқытпаймыз. Қосымша жобалардан түскен қаражатты Іскерлік журналистика мектебінің мақсатына жұмсаймыз.
– Тәжірибелі журналистер де бұл саланы меңгергісі келеді. Бұл бағытта курс ұйымдастыру ойларыңызда жоқ па?
– Біздің мақсат – алдымен жастарды дайындау. Жалпы, биыл «Іскерлік журналистика мектебі» аясында 30-ға жуық қаржы, бизнес, мемлекеттік құрылымдардың басшылары дәріс оқиды. Барлық журналистер бұл дәрістерге қатыса алады. Бұдан бөлек, жуырда «Атамекен» ҰКП өңірлік журналистер үшін «Іскерлік журналистика мектебі» жобасын бастады. Алғашқы шара Ақтөбе облысында өтті. Алдағы уақытта басқа өңірлерде жалғастырсақ деген ниеттеміз. Сондай-ақ, іскерлік тақырыбында жазатын журналистер үшін арнайы платформа ашылмақ. Ол жерде қаржы, экономика, бизнеске қатысты дайын контент жарияланып отырмақ. Журналистер қалаған ақпаратты, деректі алып пайдалана алады.
– Алдағы жоспарларыңыз қандай?
– Келесі жылы іскерлік журналистика, жеке қаражатты басқару, бизнес бастау бойынша кітаптар, нұсқаулықтар шығарсақ деп отырмыз. Қаржылық сауаттылық, қаражатты басқару, кәсіпкерлікпен айналысу өте маңызды.
– Әңгімеңізге көп рахмет!
Әңгімелескен Меруерт НҰРЛАН.