СЫРЫМ РАХЫМОВ
Тағы бір аяулы әріптесімізден айырылдық. 69 жасқа қараған шағында белгілі ақын Сырым Рахымұлы Рахымов өмірден озды.
Сырым Рахымов1948 жылғы 16 қарашада Көкшетау облысы, Зеренді ауданындағы Қошқарбай ауылында туған. Өзінің алғашқы еңбек қадамын ол Бескөл орта мектебінде пионер вожатыйлығынан бастап, әскер қатарында азаматтық борышын өтегеннен кейін комсомол комитетінің хатшысы болып істеді. 1973 жылы Целиноград транспорт құрылысы техникумын бітіріп, мастер-инженер, 1981 жылдан Көкшетау облысы азаматтық қорғаныс штабының қалалық курсының жетекшісі, кейін кадрлар даярлайтын және оқытатын орталықтың жетекшісі болып, ұзақ жыл абыройлы қызмет атқарды. Халық депутаттары Көкшетау қалалық кеңесі төрағасының орынбасары болып сайланып, он бір жылдай Көкшетау қалалық аумақтық сайлау комиссиясын басқарды. Туған қаласының мәдениеті мен әлеуметтік саласын дамытуға қосқан сүбелі үлесі үшін оған 2014 жылы Көкшетау қаласының Құрметті азаматы атағы берілді.
Сырым Рахымұлы көптеген республикалық мүшәйралардың, қалалық және облыстық конкурстардың жеңімпазы. «Я стихи напишу на снегу» және «Осенний поэт» өлеңдер жинағын шығарды. «Құрмет» орденімен, «Астанаға 10 жыл» медалімен, Қазақстан Республикасы Президентінің, Ақмола облысы әкімінің, Төтенше жағдайлар министрлігінің Алғыс хаттары және Құрмет грамоталарымен марапатталды.
Аяулы әріптесіміздің жарқын бейнесі оны білетіндердің жүрегінде ұзақ сақталады.
Қазақстан Жазушылар одағы
басқармасының секретариаты.