«Қазақ әдебиеті» газетінің өткен нөмірінде (2016 жыл, 26 тамыз, №32) 443 қаламгер қол қойып, «Қазақстан Жазушылар одағының Құрылтайын ұйым Жарғысына сай өз мерзімінде, яғни келер 2017 жылдың күзінде өткізу қажет» деп ел Президенті Нұрсұлтан Әбішұлы Назарбаевтың атына арнайы «Ашық хат» жолдаған болатын. Аталған «Ашық хатта»: «Одақ – қоғамдық ұйым ретінде өзінің қызметін қалтқысыз атқарып келеді. Барлық кезеңдерде ұйым басшысы арнайы Құрылтайда баламалы негізде, ашық сайлау жүйесімен өткізіп келді. Қаламгерлер өзі қалаған басшысын басым дауыспен сайлады.
Арызға қол қойған 15 қаламгердің пікірі ұйымға мүше 750-дің пікірі емес. Сондықтан Тәуелсіздігіміздің мерейлі 25 жылдығында қалың қаламгер қауымды дүрліктіріп, кезектен тыс Құрылтай өткізуге еш негіз жоқ. Шығармашылық ұйымның мерзімді Құрылтайы өз мезгілімен, келер
2017 жылдың күзінде, тамыз-қыркүйек айларында өткені дұрыс деп білеміз» делінген болатын.
Сол хатты басылымнан оқыған әріптестеріміздің кейбірі өздері хабарласып, бірқатары арнайы Одаққа келіп: «Біз де бұл Ашық хатты қолдаймыз, кезектен тыс жиын шақыратындай не басымызға күн туды? Төраға орнында. Ұйым өз жұмысын жүргізіп жатыр. Тіпті, кешегі соғыс жылдарында да мұндай алашапқын болған емес, Құдай оның бетін ары қылсын. Бүйректен сирақ шығарып, от ала келудің, әріптестердің арасын алатайдай бүлдірудің түкке де қажеті жоқ!», – деп өздерінің азаматтық көзқарастарын ашық білдірді.
Сонымен, өткен нөмірде жарық көрген қаламгерлердің «Ашық хаты» реттік нөмірімен ары қарай жалғасады.
"Қазақ әдебиеті" — Қазақстан Республикасының әдебиет, мәдениет және өнер газеті. Әр апта сайын, жұма күні шығады.
Газет 1934 жылдың 10 қаңтарынан бастап шыға бастады. «Қазақ әдебиеті» газеті — Қазақстан жазушылар одағының органы ретінде тұңғыш саны 1934 жылдың қаңтарында жарық көрген.
«Қазақ әдебиеті» - газетінің тарихы
Студия «Team28»