«…рұқсат беруіңізді өтінем»
«Қамшының сабындай қысқа өмірді» қазекең өткеніне көз салып отырып айтқан-ау, шамасы. Себебі, арттағыға ой жүгірткен жан талай қызықтың тасада қалып бара жатқанын байқайды. Сөйтіп, жадының қатпарына жасырынған жайларды бір сілкінтіп, еске түсіреді. Алматы мен Астана секілді мәшһүр қалалардан шалғайда жатқан ақын Ақұштап Бақтыгереева өткен ғасырдың соңында жазушылық ортада жүріп, талай қанатты сөз қалдырған қазақтың белгілі ақын-жазушыларының мінез, болмысы жайлы жазған естелігі бізді көп ойға қалдырып, ақырында «Есімдегілер» деген жаңа айдарды ашуға ұйғардық. Атақты ақын Әбділда Тәжібаевтың осы аттас кітабы жаңа айдардың жорасына құп келгені қандай ғанибет. Айдардың алдағы нөмірлерімізде жалғасын табары сөзсіз.
ЖҰМЕКЕН АҚЫН АСҚАН ЕТ
Өмірдің жолы бұралаң, адамдардың бір-бірімен кездесуі де кейде қызық жәйттерге толы болады. Бірақ, күнделікті күйбең тірлік көбін ұмыттырып жібереді екен де, ұмытылмас жарқын сәттер санаңда ұялап, жүрегіңе жазылып қала береді екен.
1971-1972- жылдары ақын ағамыз Жұмекен Нәжімеденов Мәскеудегі Әдебиет институтының жоғарғы курсына оқуға барады. Әлем әдебиеті жайлы мамандардан дәріс алу ол кезде кез келген ауылдан шыққан ақын үшін үлкен жетістік екені анық. Жазғы демалысқа келіп жүрген ақын ағамызға біз мақтаныш сезіммен қарайтын едік.
Сол жылдары біз Фариза екеуміз комсомолдық жолдамамен Германияға бір топқа қосылып жол тарттық. Шет елге алғаш шығуымыз. Бір жұмадай неміс елінде ішкен тамаққа көңіл толмағаны рас, етті қатты сағындық. Сондықтан Мәскеуге жеткесін етке бір тоюды жоспарлап, қонақ үйге келе Жұмекен ағамызды іздедік. Ол кезде ұялы телефон жоқ, бірақ, Мәскеу журналдарында толған таныс ақындарымыз бар, солар арқылы Әдеби институттың жатақханасын да, вахтасын да тауып, Фариза Жұмекен ағаны телефонға шақыртты. Алматыда жүргенде де Фариза еркін еркелеп, Жұмекен қалжың қосып, қырсығыңқырап сөйлесетін, қазір де солай:
– Менің қарным ашты, – дейді Фариза.
– Оған менің қандай қатысым бар? – дейді Жұмекен.
– Ет асшы, Германияға барамыз деп, өлуге келдік, қасымда Ақұштап бар, екеуміз саған ет жеуге барайық, – дейді Фариза.
Көп сөзге жоқ ақын, жайлы қоңыр дауыспен:
– Түсіндім, такси алып өздерің келерсіңдер, – деп, әңгімені келте қайырды.
Мәскеуді Отаным деп ән салып өскен біз өз үйімізге келгендей қуандық. Ал Жұмекен ағаның оқып жатқан Әдебиет институтының жатақханасына тура нағашымыздың мекеніне келгендей асыға жеттік. Жымия күліп, жанары сағыныш пен сезімге, езуі жыр мен әзілге толы ақын аға бізге әрі мысқылмен, әрі мейіріммен қарайды. Мейірімі – өзі де елді сағынады, әсіресе, Фариза екеуінің туған топырағы өте жақын ғой, мысқылы – «иә, менің әкемді жұтқан «соғысқыштар» елінен не таптыңдар» дегендей, бірақ, дауыстап айтпаған ойы еді.
Фариза аман-саулық сұрасып болған соң:
– Қазан-ошақты білмейсің, ет асып ұқсата алдың ба? – деді, ол кезде де сіз деп сызылмаған әдетімен.
– Менің қарным тоқ, бірақ Фаризаға піскен еттен бірдеңе ауысатын шығар, – деп қалжыңдап қойды.
Жұмекен ағада әзір жауап жоқ, бөлмесінің кілтін ашып бізді кіргізді, қалай барып-қайтқанымызды сұрады, бірақ жауабын күткен жоқ, шығып кетті.
– Осы біздің ақындарымыз біртүрлі ғой, әлде мазалағанымызға бұлданып тұр ма? – деп Фариза маған қарады.
– Өзің де біртүрлі екеніңді сезбейсің-ау, өмірі отау ұстамаған қазаққа ет астың ба деп дікілдейсің, «Әне ет, керек пе пісіріп же!» десе не демекпіз?! – дедім.
– Екі ақын қарындасының еркелігін көтермесе оның несі еркек, – деп Фариза өз мінезіне басты. Біздің қысқа әңгімеміз бітер-бітпесте жымиып күлген Жұмекен аға жатақхананың ас пісіретін бөлмесінен шағын табағын көтеріп, бұрқыраған ыстық тамақты алып кірсін.
– Екеуің тоятын ет астым, осы жете ме? – деп бізге қарады. Бізді қарсы алғанда жымиған жылы күлкісі әлі жүзінде сақтаулы жүр.
– Мен етке қамыр илеу білмеймін, өзім де Нәсіптің іңкәлін сағындым, ірі макарон да мұндайда болады екен, оған ренжімеңдер, – деп ақталып тамақты үстелге қойды. Үстінде мүжитін сүйегі де бар екен, былқып піскен сиыр етін жеуге кірістік. Біз сол бір кездесуді ұзақ көрмей сағынысқан аға-қарындастарша өткіздік. Саусағымызды батырып ірі макарондарды теріп жедік, үшеуміз бір сүйекті бөлісіп мүжідік. Фариза сіңірін кесіп берші деп еркеледі, мен ішінде майы жоқ па деп сұрадым. Елді айттық, ақындар жайлы айттық. Кейбір сұрақтарына Фариза:
– Дәл осыны мен ренжісін деп айтып отырсың, ал мен ет асқаның үшін, қарсы алғаның үшін осы жолы ренжімесем қайтесің, – дейді ол:
– Сенің ренжіген түрің қызық қой… – дейді.
Сол бір жүздесу талай қонақ жиналған дастарханнан жылы болды, сол ақын пісірген ет өте дәмді болды, өйткені шын көңіл мен ақын жүрегінің адал сәулесіне бөленгенбіз.
Біз Қазақстандықтар тобын қаздай тізіп санап апарған басшылар іздеп қалар деп комсомолдық жолдаманың тәртібін сақтау үшін белгілі уақытта қонақүйге келдік, келесі күні Алматыға ұштық. Фариза екеуміз Жұмекен аға асып берген етті әлі күнге еске аламыз.
ОСПАНХАН ӘУБӘКІРОВТІҢ ҰЛЫМЕН КЕЗДЕСУІ
1980-ші жылдардың басында Жамбыл-Байзақов көшелері қиылысындағы жазушылардың ақ үйіне ең талантты сықақшы Оспанхан ағамен көршілес қоныстандық. Жазғандарына әбден қанық біздер ол кісіні көрген бетте күлімдей бастаймыз. Өзі де жүзі жып-жылы, жүрегі де жылы, ренішке жоқ сыпайы жан еді, Нұрсұлу апамыз да өте жайлы адам. Ол кісі жайлы қызық әңгіме де көп айтылады.
Бір жылдары Оспанхан ағаның үлкен ұлы Азамат сонау Карл Маркс (қазіргі Қонаев) көшесінің бойындағы 12-қазақ мектебінде бастауыш сыныпқа барады. Бір күні түске қарай сабақтан шыққан бала трамвайға отырса, алдында Оспанхан аға тұрады. Баласы Азамат:
– Әке, сіз де үйге бара жатырсыз ба? – деп сұрайды, қуанған қалпында. Жазғаны да, өмірі де әзіл-күлкіге толы сықақшы ағамыз:
– Әй, бала, не деп тұрсың, мен сенің әкең емеспін, мынау қайдағы бәле, өз әкесін өзі танымайтын, – деп бұрылады да трамвайдан түсіп қалады. Топ адамның арасында қыстырылысқан баласы аң-таң кете барады.
Оспанхан ағамыз тездетіп такси ұстап үйіне келіп, киімдерін ауыстырып жұмыс бөлмесіндегі диванға жатып қалады. Ондаған аялдама жүріп, шаршап-шалдығып, сөмкесін тірсегіне соғып үйіне жеткен Азамат диванда газет оқып жатқан әкесін көріп, тағы аң-таң болады.
– Әке деймін, әке, жаңа ғана мен трамвайдан сізден аумай қалған бір ағаны көрдім, – дейді аптығын баса алмай.
– Иә, сен оған не дедің? – деп сұрайды, әкесі сабырлы қалпы.
– Әке, үйге барасың ба? – дедім.
– Ұят-ай, бөтен біреуге әке деп жармасуға ұялмайсың ба, сенің әкең мына менмін, – дейді сықақшы. Баласы әлі аң-таң.
Оспанхан ағаның әр күні жазуы сияқты күлкіге, әзілге, қалжыңға толы болатын.
АЙБЕРГЕНОВ АРНАҒАН ӨЛЕҢ
1965 жылдың күзі, қыздар институтының студенттері Қаскелеңдегі Абай атындағы мектепке педпрактика өтуге бардық. Қала шетіндегі Матрена деген орыс кемпірдің бір бөлмесін төрт қыз жалдап тұрдық. Бір күні мектептен қайтар жолда бұрылыстағы үлкен терек түбінде қойтасқа шығып бір ақын қазақша дауыстап өлең оқып тұр, бізбен қатар практика өте келген бұрынғы КазПИ (қазіргі АГУ-дың) төрт-бес студент жігіттері қоршап алып тыңдап тұр екен. Бізді көріп жігіттер шу ете қалды. – Қыздар, келіңдер өлең тыңдаймыз, Қарақалпақстаннан келген мықты ақын, өлеңдері қызық деді. Ол кезде қыздар келіңіз дегенге оп-оңай бұрыла бермейді, біз үш қыз елең қылмай кете бардық. Біз бұрылған көше асфальтсыз, мен туфлиімнің өкшесін тасқа соғып алып сәл кідірдік те ілгері кеттік. Елін сағынып келіп, кімге өлеңін тыңдатарға білмей, үй-күйсіз үш баласын жетелеп Қаскелеңде жүрген Төлеген Айбергеновтің біздің бұрылмай кеткеніміз намысына тигендей болыпты. Студент жігіттер мені сырттай ақын қыз деп таныстырыпты, Оралдан екеніме дейін баяндаған ғой.
Арада бір аптадай уақыт өткен. Біз бір мерекелік концерт дайындадық. Сол күні КазПИ-дің жігіттеріне еріп Төлеген Айбергенов те келді. Дайындықтың соңына қарай жігіттер жаңа келген ақынға да өз өлеңін оқытып, бағдарламаға қосуды ұсынды. Ол кезде көрермен өлең тыңдауға өте құштар болатын. Біреулер қыздармен айтыстыру керек дегенді ұсынды, әйтеуір, у-шу. Поэзия кештерінде менің ауызекі шумақтар айтатыным бар-ды. Ақұштап айтыссын деп қыздар жағы да шуылдасты. Ол кезде айтыс деген жоқ еді. Келесі күнгі дайындыққа тағы келген ақын бір ғажап сағыныш жайлы өлеңін оқыды, біз бағдарламаға қостық. Біраздан соң домбыра сұрап алып үш шумақ өлеңді тамақ қырған жәй дауыспен әнге қосып айтты.
Сен маған душар болдың
Батқанда бақтар сырға,
Мен саған сусар болдым
Қатқанда қаңтар шыңға.
Деміме менің алқынған
Сен енді тоқтарсың ба,
Оралып өткен алдымнан
Оралдан ұшқан көк қаршыға.
Сен жүрсің жанарымда
Жолы боп басқа өлеңнің,
Тастары табаныңда
Жарқылдап Қаскелеңнің.
Қыздар шу ете қалды. Маған жауап бер тез дейді. Өлең сөздері төгіліп тұр екен, менің де шабытыма әсер етті, тіліме сол ұйқаспен мына жолдар оп-оңай орала кеткені
Жырыңа қанбайтынмын
Ауатын назарым көп,
Мен сені ойлайтынмын
Жастықтың базары деп,
Жалынның барлығына
Күймес деп ойлайтынмын
Саусағы әр бұрымға
Тимес деп ойлайтынмын
Екенсің қызық ақын
Алмастай өткірлігі,
Қыз көрсе қызығатын
Болдың ғой көптің бірі, –
дедім. Студенттер мәз болды, жауап күтіп қол соқты. Ауызекі айтысқа жоқ ақын тез бұрылып шыға жөнелді. Кейін бұл өлең А-ға деген атпен көлемдірек жазылып кітабына енді. Бұл менің Айбергеновпен алғаш кездесуім болса, оқу бітіргесін Оралға келіп редакцияда жұмыс жасап, 1967-жылдың жазында Алматыға қайта оралған едім. Бір топ ақын Қарақалпаққа кеткелі жатыр екен. «Қазақ әдебиеті» газеті редакциясына келіп Төлеген перзентханаға Үрниса деген келіншегіне телефон шалды. Тас бұйра қара шашы шашылып кеткен, егіз қызым бар деп ентіге сөйлеп, туған жеріме кетіп барам, қуанышым кеудеме сыймай тұр деп шығып кетті. Ол сол сапардан оралған жоқ. Үрниса Хұсни-Хорланын құшақтап перзентханада қала барды.
ОСПАНХАН ҚАТЫСҚАН ШӘРБАНУ ҚҰМАРОВАНЫҢ ТОЙЫ
1970-1971-жылдарда Жазушылар Одағының Әдебиетті насихаттау бюросы жемісті жұмыс жасады. Үш қаламгерден тұратын ақын-жазушы ел аралайтын. Қызықты кездесулер, оқырманмен әңгіме, ақындар айтып кеткен деген тапқыр ойлы шумақтар ел аузында гулеп тұратын бір қызық дәурен еді.
Бір күндері Шәрбану Құмарова сондай сапардан көңілді оралсын. Қызылорда облысын аралаған қаламгерлер Аралға соғады. Қызықты кездесулер мен ән-күйге бөленген думан кештерде ән салған Шәрбану бір өнерлі жігітке ұнап қалады. Махаббат деген де ойламаған жерден жабысатын дерт қой.
Шәрбану Ырза Қунақовамен дос, ал Ырза Фариза редакторы болған «Қазақстан пионері» газеті редакциясында қызмет істейтін. Мен «Жұлдыз» журналында. Мұқағали Мақатаевпен қызметтеспін. Таңертең жұмысқа келіп отыра бергенімде Фариза телефон шалды:
– Бүгін түскі шәйді біздің редакциядан ішеміз, Ырза дастархан дайындап жатыр, Шәрбану елге барып бір жаңалық әкелген дейді, анық-қанығын өз құлағыңмен өздерінен естірсің, – деді.
Қазіргі көкбазар жанындағы баспалар үйі ол кезде ғажап көңілді сияқты еді. Қалам ұстаған журналистер мен ақын-жазушылар бірі кіріп, бірі шығып, пікірлесіп, сөйлесіп, жазғандарын редакцияларға апарып, сәлемдесіп, сырласып жүретін еді. Жиналып шәй ішетін де уақыт табылатын. Біздің де шәйіміз бұл жолы дәмді болды. Шәй үстінде Ырза қуанышы қойнына сыймай тұрған адамша ынтыға сөйлеп, біздің Шәрбан сыңарын тапқан, осы сапарда бір ғажап өнерлі жігітті кездестірген, оны ұнатқан, өзі де ұнаған, серт берісіп, сөз байласып қайтқан, кешікпей той болады дегенді жеткізді.
Бір қаламдасымыздың бақыт тапқанына неге қуанбасқа, біз де құттықтадық. « Әйел қырық шырақты» деген ғой, өзі әнші, өзі биші, қаламы бар, ойы бар, келбеті де келісті Шәрбану бақытты болуға лайық деп тарадық. Кешікпей күткен күйеу де жетті, Алматының бір ресторанында шағын той өткіздік. Тойға Әбіш Кекілбаев бастаған Шәрбанудың курстастары келді, Асанәлі Әшімов Майрасымен болды. Жазушы, әртіс, ағайын-туыс бір көңілді жиын өткені рас. Күйеу Аралдан келген Төлеу Қосанов деген, сөз десе сөзі, ән десе әні бар, шешен, пысық сөйлесетін, адам жатырқауды білмейтін, пішімі де мол жігіт болып шықты.
Сол кештің орта тұсында құттықтау сөз Оспанхан Әубәкіровке берілсін. Көңілді қауым жымыңдап сөзден бұрын күле бастадық. Оспанхан аға негізі шаршы топта суырылып сөйлемейді, ыдық-быдық екі сөйлем айтады, ал жазғанын оқысаң ғой ішегің түйілетіні. Жұрт түгел сатирик жазушыға назар аударған, тыңдап отыр. Ол болса бір оралған шағын қорабын ашып әуре. Ашты. Ішінен қағазға оралған нәрсені алды, оның орауын ашып жерге тастады, қорапты да тастады. Менің әкелген сыйлығым бар еді дейді, орамдардан әлі таппайды. Жұрт ду күліп қайта күтеді. Шыдамсыз біреу дауыстап жібереді:
– Әй, Оспанхан, болсайшы, ол не сыйлық таптырмайтын соншама?
– Асықпа! – дейді сатирик. – Уһ, таптым, таптым! Енді арнап жазған өлең оқиын… – Әр қалтасын бір ақтарады, әзер деп бір қағазды төс қалтасынан алып оқыды. Сондағы өлең:
Шәрбанжан түстің бүгін келін болып,
«Танкібай» сен де жеттің ебің болып,
Екеуің бұдан былай айырылмай
Мәңгіге қалыңдаршы желімделіп.
Сыйлығым «Суперцемент» деген желім-клей. Бұл темірді де, ағашты да қатырып тастайды екен деп, өлеңдегі «Танкібай» сөзіне түсініктеме берді. Төлеудің теңеуін кәдімгі танк деген сөзден алдым деді. Оспанханның сол тойдағы әр қимылы күлкіге толы еді.
ПРОСТО ДОМБЫРА
Атақты ақ үйіміздің төртінші кіреберісінде сыншы Зейнолла Серікқалиев тұрды. Сөзге сараң, мінезге ауыр, орынсыз күлмейтін, көппен тез араласа кетпейтін ұстамды азамат еді. Ондайды қазақ бір ізбен кіріп, бір ізбен шығады деп суреттейтін сияқты. Қарсы келсе бас изесетінбіз, менің қасымдағы үйелмелі-сүйелмелі үш қызымды көргенде жас балапанға үңілгендей ерекше бір елжіреп қарап күліп-күліп қала беретін, кейде бұрылып жанарымен шығарып салып тұратын. Осы көзқарастан сәбиге деген сағынышын сезу қиын емес еді, сондықтан мен Зейнолла Серікқалиев келе жатса ол өтіп кеткенше қыздарымды дәлізде бөгелтем, не бұрыштан алдап-сулап сырт жаққа алып кетіп, үйді айналып кіргізем. Адамның бала сүймеуі де үлкен қасірет екенін сезіну де ауыр ғой. Оның үстіне Есенжол Домбаев құрдасында үш ұл, елге барғанда Зейнолланың әкесін көргенін, жалғыз ұлдан ұрпақ сүймегенге өкінетінін әңгіме арасында айтып қалатын.
Біздің отағасы (Ғабдрахим) Атыраулық қой, елден сәлемдемеге ол кезде балық пен икра көп келетін. Ал Зейнолла Серікқалиев Теңіз ауданынан, ол да балықты ұнатады. Бір күні балық түсіріп жатқанда Есенжол да, Зейнолла да есік алдынан шыға келіп:
– Оһо, бүгін Ғабдрахимнан балық жейміз, – дейді. Әрине, солай болады. Кешкісін біздің үйден балық жеуге бәрі келеді. Тағы да көңілді жиын. Ол кезде жаспыз, адам жатырқау жоқ, біреуге біреу еріп келе береді. Бәрі дос сияқты… Кімдер болғаны түгел есімде жоқ, әйтеуір, әңгіме айтылып, күй тартылып, ұзақ отырыс болғанын білемін. Ол кездің балалары да «мықты». Бір бөлме у-шу, екіншіде олар ұйықтай беретін еді.
Есте қалғаны Зейнолла Серікқалиевтің мінезі еді. Біраз қызу болатын. Домбыра сұрап алып «Қарабас» күйін ойнады. Араларында бір домбыраны нашарлау ойнайтын біреуге көңілі толмай ренжи бастады.
– Сен қой, олай тартпа! – деп батып айта алмайды. Өзі мінезі жұмсақ. Соған қаратып, «Әй, мынау просто домбыра», – деп домбыра ұстаған қолын жоғары көтеріп тұрып кетеді. Қате ойнағаны үшін, домбыраны ойыншық еткені үшін ұрысқан түрі. Анау тағы бірдеңе шіңкілдетеді, Зейнолла тағы домбыраны алып, «Әй, мынау просто домбыра», – дейді, орнынан тұрып кетеді. Домбыраны қорлама дегісі келген сөзін айта алмайды. Бәрі оның «просто домбыра» дегеніне мәз болып күледі.
Жуырда Оралдағы Қазақ драма театрында қойылған Қуандық Мәдір деген суретшінің еңбектері арасынан «Алқаракөк» атанған Зейнолла Серікқалиевтің суретін көріп, сол бір көрші тұрған жылдар көз алдымнан сусып өте шықты. Әттең, мына суретін төріне іліп, бетіндегі тозаңын сүйіспеншілікпен сүртіп қарайтын бір тұяқ қалмады-ау деген ауыр оймен оралып, осы бір сәтін қағазға түсіргенім еді. Иманы жолдас болсын!
ШЕРХАН МҰРТАЗАҒА АРЫЗ
1974 жылдың жазы. Шерхан аға «Жұлдыз» журналының бас редакторы. Ол кісі өз қарамағында жұмыс жасайтын жастарды әрі тәрбиелеп, әрі талап қойып, әрі еркелетіп ұстайтын. Таланттар мінезін қатты ұғатын. Әсіресе, Оралхан Бөкей Шерхан ағаға сәбише еркелеп сөйлейтін, еркін жүретін. Шерхан ағаның мейірі бәрімізге жететін. Фаризаны да ерекше бағалайтын. Сол жылдарда, яғни, 1973-жылдары «Жұлдыз» журналындағы әдеби қызметкер маған поэзия бөлімін уақытша басқаруды тапсырды. Өйткені, бөлім бастығы болған ақын ағамыз Мұқағали Мақатаев Одақтың ұйғаруымен Мәскеудегі Әдебиет институты жанындағы жоғарғы курсқа оқуға аттандырылды. Шерхан аға мені шақырып алып, бізде журналистикада қазақ қыздары өте аз екенін, менің бөлім басқару үшін Коммунистік партияға мүше болуым шарт екенін түсіндірді.
– Биыл күзде Жазушылар одағынан екі адамға партия қатарына өту мүмкіндігі барын да айтты. Бірі – Әбдіков Төлен, бірі – мен. Енді мінездеме жасап, Уставты жаттауың керек, өзім қадағалаймын. Анкетаны парткомнан алып толтыра баста, – деді. Басымды изеп, келісіп шықтым.
Аяқастынан Шерхан аға құрып берген жоспардың быт-шыты шықсын. Ойда жоқ кеште домбырамен ән салған жігіттің дауысына жүрегім діріл қағып, жалт еткен жанарынан жараландым, ол да ынтық, мен де ұнатам.
«Көгімнен шықты басқа күн,
жарқырап кетті аспаным,
қарсылық еткен достың да,
сөзіне құлақ аспадым.
Әсем ән тұрды үнімде,
бір шаттық тұрды түрімде,
қарсылық еткен сорлы анам,
көнерін білдім түбінде.
Не болар демей алғы күн,
не сыйлар демей тағдырым,
жаныма жайлы дәуреннің,
құрбан қып кеттім барлығын», –
деген жолдарды сонда жазған едім. Бәрін тастап, Ғабдрахимға еріп сол күзде Атыраудан бір-ақ шықтым. «Жұлдыз» журналынан кетерде Шерхан аға демалыста еді, қол қоятынына сеніп мынадай арыз қалдырдым. «Жұлдыз» журналының бас редакторы Шерхан Мұртазаевқа поэзия бөлімінің уақытша меңгерушісі болған Бақтыгереевадан арыз. Ақындық жолдан шаршағанымды ескеріп, қатын болып кетуге рұқсат беруіңізді өтінем». Шерағаң бұл арызды оқып жігіттерге айтып мәз-мейрам болып күлген екен. Кейін «дұрыс болды» деп арқамнан қақты. Міне бұдан 37 жыл бұрын жазылған арыздың сыры осындай.