ХАЛЫҚ ӘНДЕРІНІҢ БӘРІ – ХИТ
Айгүл ҚОСАНОВА:
Жүрек сөзін, көңіл назын, сезім сырын, қайғы мен қуанышты әуезді әнмен, ұйқасты өлеңмен жеткізген ата-бабамыздың бізге қалдырған қымбат мұрасының бірі – дәстүрлі әндер. Сол құндылықты жарқыратып, ұлттық өнерді насихаттап жүрген өнерпаздар аз емес. Сондай бірегейдің бірі – Батыс ән мектебінің өкілі, танымал әнші, ұстаз Айгүл Қосановамен аз-кем әңгімелескен едік.
«ҚҰСТАР ҚАЙТЫП БАРАДЫ» ӘНІ ӨЗГЕ БІР ҚЫРЫМДЫ АШТЫ
– Қазақ ән өнері туралы айтқанда Шәмші Қалдаяқовтың есімін аттап өту қиын. Ол кісінің әндерін ата-бала-немере сияқты үш ұрпақ әлі күнге дейін тыңдап, орындап келеді. Өнердегі, әндегі өміршеңдік деген осы болар?
– Қазақ ән өнерінде өзіндік орны бар композиторлар көп. Бірақ солардың ішінде ең беделдісі – Шәмші Қалдаяқов. Ол кісінің әнін тыңдамаған, айтпаған бірде-бір буын жоқ деп айтсақ, қателеспейміз. Сол кездегі отырыс, концерттер мен басқосулардың барлығында тек қана Шәмшінің әндері әуелейтін. Меніңше, Шәмші ағамыздың әндерінің өміршеңдігі – әр шығармасының халқына деген шексіз махаббатынан туғандығы болса керек. Өйткені, өз ісін жақсы көрмейтін адамнан жақсы дүние қалуы мүмкін емес. Өзінің риясыз сезімімен, жүрекжарды мұңымен, шынайылығымен, ешкімге тәуелді болмай ән шығарудың өзі үлкен жетістік. Ал, мәңгі есте қалу – бақыт.
– Н.Тілендиевтің «Құстар қайтып барады» деген әні сіздің тамаша даусыңызбен жүректен жүрекке жетті, жете бермек. Осы ән сіздің жан-дүниеңізге несімен жақын?
– Бұл ән менің тағы бір қырымды ашқан туынды болды. Осыдан бірнеше жыл бұрын бір ән жобасында әнші Саят Медеуовпен дуэт айту ұсынылды. Өзің білесің, дуэт айту оңай емес. Себебі, сен таңдаған ән қасыңдағы әншінің дауысына, табиғатына жат болмауы керек. Біз «Қандай ән айтсақ болады?» деп ойланып жүрдік. Бір күні композитор Бағлан Омаровтан кеңес алуға бардық. Сол кезде Бағлан жайлап фортепианомен бір әуенді ойнап, «Осыны айтып көріңдерші» деп ұсыныс жасады. Содан айттық. Сәтті шықты. Бұл ән менің ең алғаш рет эстрадада айтқан әнім. Саяттың әдемі қоңыр даусымен менің даусым үйлесіп, үндесіп, халық өте жақсы қабылдады. Ең бастысы — Нұрғиса Тілендиев атамыздың әнінің құдіреттілігі еді. Ән әдемі болған соң, оны орындаушы қалайда биікке шығарып айтуға, әннің обалына қалмауға міндетті.
…
Сұхбаттасқан
Дүйсенәлі ӘЛІМАҚЫН
(Сұхбаттың толық нұсқасын газеттің №13 (3647) санынан оқи аласыздар)