ШЫНДЫҚ ШЫРАҒЫ
Кейінгі жылдары оқыған екі кітап ерекше есте. Біз пақырыңызды апта аралатпай кездесулерге шақыратыны рас. Бәлсінуге ұяламыз. Барамыз. Мектептерге. Тағысын-тағыларға. Осынау екі кітап турасында көбірек толғанамыз. Қайбір жылы жазға салым саумал шақта, маусым айында «Он бес үй» деген кітап кездескен. Бізге. Қуана қауышқанбыз. Туған ауылымыз Таупістелінің Балбастауы басында, баяғы бала кезімізде кітапқа құныға үңіліп отыратын жерімізде сол «Он бес үйді» бас алмай оқығанбыз. Қатты әсерленіп, санамыз сәулеленіп, тебіренгенбіз. Көп кешікпей-ақ «Шынайылық шырағданы» атты мақаламызды мәністегенбіз. Жарияланған. Ол шынында да шынайылық шырағданындай кітап еді. Қамзабектейін қазағыңыздан, марал кешкен Машаттайын мөлдір бұлақ бойындағы ауылдан өрбіген он бес ұл-қыз, олардың түп-тамыры, тағдыр-талайы, үш ұрпақ өкілдерінің өрістері, өнеге-өрелері хақында хикаяланған, салт-дәстүр, тәлім-тәрбие, өзге де отбасылық құндылықтар, әулеттік әуезелер турасында шүйіркелеспекке шақырған ғажайып қазынаңыз ғой ол. Осынау жасыл мұқабалы жинақты отбасылық оқулық ретінде ұсынғымыз келетінін һәм ашық айтқанбыз.
* * *
Сол бір кітаптан кейінгі келесі жазға салым, саумал шақта «Шал мен шындық» дейтұғын кітапты оқыдық. Тағы да Таупістеліде. Балбастаудың басында. Көкбұлақтайын өзеніңіздің тепсеңді тұсында. Құлбайшоқының қалқасында. Жыл сайынғы жазға қарата жақұт жинақ кездесіп тұрғай да. Дейміз. Біз. Жақсылыққа жорып.
Қалидайын қаламгеріңіздің қазынасы. Қоңыр бояуы басымырақ. Кітабының мұқабасын меңзеп отырыппыз. Қалиыңыз, қазағыңыздың сөзін ұстар ұстын ұлдарынан саналар санаткеріңіз – Қали Сәрсенбай қоңыр түсті жарататынын біліңкірейміз. Кітап мұқабасының бастапқы жағы бел ортасына дейін қоңыр. Етек тұсы да сондайлық. Ал, сол қоңырқайлықтың аралығы ақиқаттайын аппақ. Ақиқаттайын аппақтың бетінде «Шал мен шындық» деген жазу. Шырқырайтындай. Шырылдайтындай. Әуелгі жақұт жинағыңызды «Шынайылық шырағданы» деп бағамдасақ, бұл бөлекше дүниеңізді «Шындық шырағы» деп бағалағымыз бар.
Қали Сәрсенбай бауырымыздың бұл кітабы «Сөз сәулесі», «Оқи отырыңыз», «Тұлғатану», «Бүкпесіз әңгіме» сынды тараулардан тұрады. Жалпы жауһар жазбагер, қарымды қаламгер Қали Сәрсенбайдың қай-қандай дүниесі де оқырманның ой-санасына орасан әсер ететіні, не-нендей туындысы да бейтарап қалдырмайтыны бұрыннан-ақ белгілі. Мына жинағындағы бірер сөзбен, бір-екі сөйлеммен ғана кестеленетін келісті ойлар, терең тағылымды тұспалдар таңырқатады. Біз үнемі еске саламыз, имам Ғазали данышпаныңыз «Ақылдыға бір сөз, зейіндіге ишара жеткілікті» деген ғой. Сол кісінің меңзеуі мәнзелдес астарлар «Сөз сәулесі» тарауында көбірек сияқты…
Мархабат БАЙҒҰТ
(Толық нұсқасын газеттің №12 (3646) санынан оқи аласыздар)