ОҚУШЫЛАР ЕНДІ «ҚОБЫЛАНДЫ БАТЫР» ЖЫРЫН ЖАТҚА АЙТАДЫ
Өткен жылғы «Тұлпар мініп, ту алған» бәйгесін ұйымдастырушылар биыл енді оқушыларға «Қобыланды батыр» жырын жатқа айтқызбақ.
6-10 сынып оқушылары арасында өтетін байқауға 50 мың оқушы қатысады. Байқауға қатысты ұйымдастырылған шарада ҚР Ақпарат және коммуникациялар министрі Дәурен Абаев жобаның ерекшелігіне тоқтала келіп: «Жоба мемлекет басшысының «Ұлы даланың жеті қыры» атты мақаласымен де, биылғы Жастар жылымен де тығыз байланысты. Басты мақсат – оқушыларды рухани адамгершілік қырынан дамыту және қазақ халқының «Алпамыс батыр», «Ер Тарғын», «Қобыланды батыр» және тағы басқа эпостары арқылы бай этномәдени және философиялық мұрасы негізінде тәрбиелеу», – деді. Байқауға қатысатын оқушылар «Қобыланды батыр» жырының Марабай жырау нұсқасын жаттайтын болады және алдын ала БАҚ-та жарияланған тақырыптар бойынша эссе жазады. Байқау үш кезеңнен (екеуі – іріктеу, біреуі – ақтық) тұрады. Аудандық кезең осы жылдың 22-28 сәуірі аралығында, облыстық кезең 29 сәуір мен 23 мамыр аралығында, ал республикалық кезең маусым не шілде айында өтпек. Сынға түскен мектеп оқушысы 107 беттен тұратын «Қобыланды батыр» жырын толық жаттаса, аталған көрсеткішті «Гиннесс» рекордтар кітабына өтінім беру де жоспарда бар.