БЕКМАХАНОВТЫҢ ІЗБАСАРЛАРЫ
Ш.Уәлиханов атындағы Тарих және этнология институтының Жас ғалымдар кеңесінің ұйымдастыруымен «Елбасының «Ұлы даланың жеті қыры» атты мақаласы мен «Рухани жаңғыру» бағдарламасын тәжірибелік тұрғыда жүзеге асырудағы жас тарихшы-ғалымдардың міндеті» тақырыбында VI халықаралық ғылыми-тәжірибелік конференция өтті.
Конференцияда жас ғалымдар Елбасы мақаласында қамтылған бастауларға сәйкес өз ізденістерін және жаңалықтарын ортаға салып, ұсыныстарын айтты. Іс-шара барысында Ермұхан Бекмаханов атындағы жас тарихшы-ғалымдар арасындағы дәстүрлі республикалық байқаудың жеңімпаздары анықталды. Биылғы байқауға Қырғызстан, Тәжікстан, Польша, Ресей, Ауғанстан сияқты елдердің жастары да жұмыстарын жіберген. Байқауға ұсынылған 80-ге тарта ғылыми мақаланың ішінен таңдаулы 70 мақала конференция жинағына енгізілді. «Ер Жәнібек» халықаралық қоғамдық қорының демеушілігімен өткен байқау қорытындысы бойынша Ш.Уәлиханов атындағы Тарих және этнология институтының PhD докторанты Қуаныш Мурзаходжаев жеңімпаз атанды.