ТАЛДЫҚОРҒАНДА ЖАҢА ТЕАТР АШЫЛДЫ
Күні кеше ғана Талдықорғанда жаңа театр өз жұмысын бастады. Жаңа өнер ордасы өз шымылдығын жаңа шаңыраққа қоныстанған Б.Римова атындағы театр ұжымы сахналаған қазақ классикасының жауһары – Мұхтар Әуезовтің «Айман-Шолпан» комедиясымен ашты.
Облыс бюджетінен 6 млрд. теңгеге жуық қаржы бөлінген құрылыс нысанын пайдалануға беру Орта Азия елдерінің 7-нші Халықаралық театр фестивалімен орайлас келді. Халықаралық сайыс қарашаның 6-сына дейін жалғасады. Аталған шараға Түркия, Түркіменстан, Ресей, Башқұрстан, Қырғызстан т.б. елдердің театрлары қатысуда. Салтанатты шараның ашылуында КСРО Халық әртісі, Мемлекеттік сыйлықтың лауреаты, Қазақстан Театрлары ассоцациясының төрағасы Асанәлі Әшімов құттықтау сөз сөйледі. Сондай-ақ, Талдықорған театрының ресми ашылу салтанатында өнер саласында тер төгіп жүрген бірқатар жастарға «Серпер» жастар сыйлығы табыс етілді.