«ӘЛЕМ ДАУЫСЫ» САРЫАРҚА ДАЛАСЫН ЖАҢҒЫРТТЫ
«Астана Опера» театрының камералық залында Әлемдік және дәстүрлі діндер көшбасшыларының «Діндердің көшбасшылары қауіпсіз әлем үшін» тақырыбындағы VI съезін өткізу аясында «Астана – Әлем дауысы» халықаралық фестивалінің салтанатты ашылу рәсімі өтті. Аталған мәдени шара Елордамыздың 20 жылдығына орай ҚР Мәдениет және спорт министрлігінің қолдауымен «Рухани жаңғыру» бағдарламасы аясында тарихи-мәдени мұраларды сақтау, дамыту және насихаттау мақсатында ұйымдастырылды.
Кеште Астана қаласы әкімдігінің Мемлекеттік академиялық филармониясының камералық хоры отандық және әлемдік хор мектептері шеберлерінің үздік туындылары мен заманауи өңдеудегі халық әндерін орындады. Ал қазанның 10-11-і күндері Астанаға бес континенттен жиналған әртүрлі діндер мен конфессиялардың өкілдері ретінде 500 әртіс келді. Бейбітшілік және Келісім сарайының сахнасында тұңғыш рет біртұтас шығармашылық ырғағында соғыссыз және терроризмсіз бейбітшілік үшін ән шырқалды. Елбасы Н.Ә.Назарбаев бастамасымен ұйымдастырылған Съез бейбітшілік, келісім және төзімділік орталығы ретінде Астана мәртебесін нығайтуда маңызды рөл атқарады. Тыңдармандар екі күн қатарынан әлемнің 20 елінен, яғни, АҚШ, ОАР, Израиль, Мажарстан, Түркия, Болгария, Ресей, Беларусь Республикасы, Грузия, Әзербайжан, Өзбекстан, Қырғызстан, Шри-Ланка, Индонезия, ҚҰР және т.б. елдерден келген музыка шеберлерінің өнерін тамашалады.