«100 ЖАҢА ЕСІМ» ЖОБАСЫНЫҢ ЕКІНШІ МАУСЫМЫ БАСТАЛДЫ
Еліміздің «100 жаңа есімі» жобасының екінші маусымына өтінім қабылдау басталды. Биылғы байқау жалпыхалықтық танымалдыққа ие болған тұлғаларды насихаттауға емес, жаңа есімдерді таныстыруға бағытталып отыр.
Яғни ел көлемінде немесе нақты бір өңір бойынша халыққа қалтқысыз қызмет етіп жүрген азаматтарға зор мүмкіндік беріледі. Сонымен бірге, өткен жылы негізгі тізімге енген, бірақ жеңімпаздар қатарынан табылмаған қатысушылар да бағын сынап көре алады. Басты талап – Қазақстанның дамуына қосқан жеке үлесі. Сондай-ақ, үміткер Қазақстан азаматы болуы тиіс. Қатысушының 18 жасқа, яғни кәмелеттік жасқа толуы міндетті.
Бұдан бөлек, биылғы жобаның тағы бір ерекшелігі – үміткер өзін-өзі ұсынуына немесе үміткерді ұйым атынан ұсынуға болады. Өтінімдер «100esіm.el.kz» сайты арқылы қазан айының ортасына дейін қабылданады. Одан әрі онлайн дауыс беру жүйесімен жалпыхалықтық дауыс беру қорытындысы бойынша жеңімпаздардың есімдері анықталады.