АСТАНАДАҒЫ ҚҰС БАЗАРЫ

0
39 қаралды

Ақбар Рысқұловқа

Ақбар-ау, өмір деген – құс базары,
Көп болған Алатауда ұшпағалы.
Адасқан мен де ақсұңқар, бүгін неге
Ұстап тұр құс ауруым ұстамалы?

Екеуіміз екі жұртта секілді едік?
Дүние кетіп барад не түрге еніп:
Оуянг Юдың да ақ өлеңі
Қазақтың қара өлеңі секілденіп…

Болдино күзі келді, өлке – сыздай,
Арқаның самалынан желке мұздай;
Есенинге есі кетіп Исрайыл жүр, –
(Ең алғаш еркек көрген ерке қыздай!).

Ұлықбек туған жерден Абай туған,
Жай тумай не бір құсты жанай туған.
Білетін құстың тілін Есенғали
Апырым-ай, адам болып қалай туған?!

Адасқан Алатаудың құсы болып,
Мен жүрмін… неге жүрмін кісі болып?
Сол сері ағылшынша сайрағанда,
Түнімен қырғыз тілі түсіме еніп…

Ақбар-ау, өмір деген – құс базары,
Көп болған Алатауда ұшпағалы.
Адасқан мен де ақсұңқар, бүгін неге
Ұстап тұр құс ауруым ұстамалы?

Серік АҚСҰҢҚАР
01.09.2018 ж.

Пікір қосу

Этот сайт использует Akismet для борьбы со спамом. Узнайте как обрабатываются ваши данные комментариев.