«Рух» халықаралық әдеби байқауының жеңімпаздары анықталды
Таяуда «РУХ» Халықаралық әдеби байқауының жеңімпаздары марапатталды. Салтанатты рәсім Л.Н.Гумилев атындағы Еуразия Ұлттық университетінің бас ғимаратында өтті.
Қазылар алқасының төрағасы Төлен Әбдік: «ҚР Президенті Әкімшілігі мен Мәдениет және спорт министрлігі қолдау көрсеткен байқау, Қазақстанның мәдени өмірінде маңызды оқиға ретінде назар аудартқаны анық. Шығармашылық аламан қазақ әдебиетін халықаралық деңгейде танытуға және Елбасы Нұрсұлтан Назарбаевтың «Болашаққа бағдар: рухани жаңғыру» бағдарламалық мақаласында белгіленген міндеттерді ілгерілетуге ықпал етеді деген сенімдеміз. Әдеби бәсекеде жасы мен кәсібіне қарамастан, әдебиет майталмандарымен бірге, жас ақын-жазушылардың да дамып келе жатқанын көрсетті», – деп ризашылығын білдірді.
Проза: роман, повесть аталымы: Гран-при – Тынымбай Нұрмағамбетов, 1-орын – Ырысбек Дәбейұлы, Проза: әңгіме, эссе аталымы: Гран-при – Несіпбек Дәутайұлы, 1-орын – Ұларбек Нұрғалым. Поэзия: поэма аталымы: Гран-при – Бақыт Беделхан, 1-орын – Несіпбек Айтұлы. Поэзия: өлеңдер жинағы аталымы: Гран-при – Ықылас Ожайұлы, 1-орын – Рауза Хузахметова. Үздік драматургия аталымы: Гран-при – Серік Асылбекұлы, 1-орын – Ардақ Нұрғазы. Әдеби сын аталымы: Гран-при – Амангелді Кеңшілікұлы, 1-орын – Бекзат Смадияр. Балаларға арналған поэзия аталымы: Гран-при – Серікбол Хасан, 1-орын – Құл-Керім Елемес. Балалар прозасы аталымы: Гран-При – Айсұлу Әлмаш, 1-орын – Лиля Калаус.
Әр аталымның 1-орын иегері дипломмен марапатталады және 1 000 000 теңге көлемінде ақшалай сыйлық иеленді. Әр аталымның Гран-при иегері дипломмен марапатталды және 2 000 000 теңге көлемінде ақшалай сыйлық алды. Байқауға барлығы 899 шығарма түскен. Оның ішінде қазақ тілінде 403, орыс тілінде 493 және ағылшын тілінде 3 туынды сарапталды. Жанрлар бойынша, «Рух» Халықаралық әдеби байқауының қоржынына қазақ тілінде 11 роман, 17 повесть, 86 әңгіме, 26 эссе, 28 поэма, 108 өлеңдер топтамасы, 27 драма, 35 әдеби сын, балаларға арналған 38 прозалық және 27 поэзиялық шығарма түсті. Ал орыс тілінде 27 роман, 26 повесть, 128 әңгіме, 31 эссе, 18 поэма, 128 өлеңдер топтамасы, 29 драма, 7 әдеби сын, 64 балалар прозасы және 35 балалар поэзиясы еңбектері бәйгеге қосылды. Ағылшын тілінде 2 әңгіме және 1 әдеби сын жолданған.