Елбасы «Діннің тұтастығы – елдің тұтастығы: діни алауыздық ұлттық алауыздыққа апарып соқтырады» деген еді. Бүгінгі таңда тек біздің елімізде ғана емес, әлемнің дамыған мемлекеттерінде де діни экстремизм мәселесі өршіп тұрғаны белгілі. Дінтанушы Кеңшілік ТЫШХАН руханияттың ең нәзік бөлшегі – дін төңірегінде өз пайымын айтып берді.
Кеңшілік ТЫШХАН, дінтанушы
– Түрлі жат ағымдардың елімізге келу тарихы қашан және қалай басталды?
– Шынын айту керек, осы уақытқа дейін біз қандай мәсһабта екенімізді де сұрастыра бермейтінбіз. Қазақ үшін жалпы «ислам діні» деген ортақ ұғым болды. Одан кейін, ол басқа дін екен деген мәселе біздің тарихымызда болған жоқ. Кезіндегі біздің дін ғұламаларымыз осы мәселенің барлығын тәптіштеп сұрап, халыққа керегін беріп отырған. Сол себепті ешқандай мәселе туындаған жоқ. Ал енді тәуелсіздіктен кейінгі жағдайымыз, одан кейін ислам мемлекеттерінің байланысы, соның ішіндегі ең үлкен қызмет атқарғаны – дінге бет бұрған жастарымыздың өз мемлекетімізде жоғары діни білім алу мүмкіндігі болмағаннан кейін, діни ғалымдар жетілмегендіктен, артынан еретін азаматтар болмағаннан соң көбісі шетелдерге діни білім қуып кетті. Соның арқасында кейбір ағымдардың орталықтарына, сол жердегі медреселерге тап болып, бірнеше жыл оқып, сол елдің суын ішіп, киімін кигеннен кейін біздің Қазақстанға солардың идеологиясын әкеліп тықпалады. Өкінішке қарай, біздің азаматтарымыз оны сұрыптап жататындай діни сауаты болмағандықтан, солардың қатарына кетті. Енді қазір діни білім беру бойынша мемлекеттік заңнамаларға өзгерістер енгізіліп жатыр. Нақты тексерілгеннен кейін қосымша шетелдердегі жоғары оқу орындарында білім алуға мүмкіндік бар. Бірақ нақты айқындалған, дұрыс екендігіне көз жеткізген оқу орындарына оқуға ғана рұқсат беріледі. Әрине, бұл кеш болуы да мүмкін. Бірақ «ештен кеш жақсы» демекші, кейінгі жастарға ие болып қалсақ та жаман емес. Дегенмен бұл ағым солай кірді. Сонымен бірге басқа да көптеген ағымдар кіріп кетті. Қазір білесіз, Қазақстанда қаншама деструктивті, дәстүрлі емес ағымдар, соның ішінде протестанттық бағыттағы қаншама ағымдар кірді. Оның ішінде қаншама қарагөздеріміз бар. Сондықтан мұның барлығы біздің ұлт болашағы үшін, діни ұлттық тұтастығымыз үшін, ертеңгі күнгі рухани бірлігіміз үшін алғышарттар деп айтуға болады. Сондықтан бұл нәрсемен әлі де болса табанды түрде күресу керек. Тек қана мемлекет, үкімет емес, жалпы азамат, қоғам, отбасы болып сергек қарауымыз керек. Өйтпеген жағдайда діни алауыздық өз қаракөз қандастарымыздың арасында ушығып кетуі мүмкін. Өйткені қазіргі әлемдік саясаттың бір ұшқыны осындай діни алауыздық тудыру арқылы мемлекетте дүрбелең тудыруға себеп болып отыр. Сонықтан біз осының алдын алуымыз керек.
– Бүгінде, әсіресе жастардың дінге көптеп бет бұрып жатқаны рас. Әйтсе де, сол жастардың көпшілігі діни білімді өз бетінше ізденеді. Осындайда олар адасып, жат ағымға кетіп қалмауының алдын қалай алуға болады?
– Бұл – ең үлкен проблема деп айтуға болады. Өйткені діни білім беру орталықтары мемлекетімізде әлі де көп емес. Тәуелсіздік алған жылдары біздің діни басқармамыз Өзбекстанға қарап тұрды. Өзбекстаннан кейін біздің өзімізде имамдар дайындайтын «Ислам институты» ашылды. Қазір енді «Нұр Мүбәрак» Ислам университеті болып құрылып, соның айналасында имамдарды дайындап жатыр. Бірақ енді бұның барлығы жеткілікті деп айту қиын. Сол себепті жастар қазір интернет заманында көптеген нәрселерді бақылап отыр. Баяғыдай мешіттердегі имамдардан емес, олар ақпаратты интернеттен ала қоюға бейім. Оның үстіне қазір бәрі әлеуметтік желіде отырады. Ал әлеуметтік желілерде дін таратушы арнайы мүдделі топтар бар. Сол арқылы олар қаншама адамдарды өздеріне тартып жатыр. Адамдарды топқа кіргізіп, онда түрлі мәселелерді талқылап, діни уағыздарды жүргізу арқылы өздеріне тартып жатқан жайы бар.
«Сәләфизм», «уаһһабизм» бойынша көп мәліметтер орыс тілінде таралған. Өйткені бұрынғы посткеңестік елдерге тарату үшін, Ресейде осы нәрсені қолдану үшін орыс тілді ортада да бұл мәселенің қарқыны жоғары. Сондықтан осы тілде айтылған уағыздар немесе видеороликтер, әртүрлі сайттарға тіркеліп, дінге кіріп жатқан азаматтар бар. Яғни, діни сауаттылық деген нәрсе әр адамға керек қажеттілік. Адам дінсіз өмір сүруі мүмкін емес. Өйткені іште қандай да бір сенім бар. Сол сенімді айқындайтын көптеген тетіктер бар. Содықтан ішкі қажеттілік қанағаттануы үшін адамдар, әсіресе жастар сол нәрсені іздейді. Бір күн болмас бір күн сол нәрсеге қарай бет бұрады. Әрине, дінге бет бұрған жастардың барлығын мешітте үйрету оңай емес. Дегенмен, қазір дұрыс бағытта білім алу үшін мемлекеттік діни басқарманың арнайы сайты, парақшалары бар, солардан үйреніп немесе арнайы сауалнама, сенім телефондары арқылы сауат ашу маңызды болып тұр. Әрине, оған бармаған жастарымыз, көп жағдайда интернеттен аламын деп адасып жатады. Сондықтан бұл мәселені де бірізділендіру керек сияқты. Ал уағыз айту, азаматтарды дінге тарту деген мәселе қазір қарастырылып жатыр. Бірақ оның бәрінің аузына қақпақ болу қиын. Сондықтан жастар осы мәселеге мұқият болса. Діни білімді мешіттерден, тіркелген арнайы мекемелерден алса. Қазір мемлекетте арнайы медреселер ашылып, жазғы сауат ашу курстары жұмыс істеп жатыр. Солардан алатын болса ертең адасып қалмас үшін өте маңызды қадам болар еді. Өйткені рухани тыныштық, рухани бірлік деген өте маңызды.
Он екі ғасырдан астам уақыттан бері ислам дінін ұстанып келе жатырмыз. Оның ішінде Әбу Ханифа бағыты Қазақстанда орнықты. Ешқандай діни алауыздық деген мәселе болған жоқ. Бізде дін ұстану жағынан кемшілік болмаған. Бізден қаншама дін ғұламалары шықты. Оның бәрін теріске шығарып, мансұқтап, оның барлығы адасқан болған, қазіргі келе жатқан «сәләфилер», «уаһһабистердің» діні ғана ақиқат, қалғанының бәрі адасқандар деу – ол үлкен фитнаның, алауыздықтың алғышарттары болып саналады. Жастар, әрине қызуқанды, бейімделгіш. Осы қасиеттеріне байланысты осындай ағымдардың
қатарын толықтырып жатқан жағдайлар бар.
– Дін – руханияттың ең нәзік бөлігі. Ол сенімге келіп тіреледі. Жастардың жат ағымға ілесуінің басты себебі олардың жүрегінде ата-бабамыздан қалған дәстүрлі дінге деген сенімінің аздығынан ба әлде бұл туралы сауатының таяздығынан ба?
– «Дәстүрлі дін» деген соңғы кезде айтылып жүрген термин ғой. Жалпы, бізде мұндай сөз болған жоқ. Өйткені, бұрыннан ұстанып келе жатқан діни көзқарасымызды басқа ағымдардан ажыратып алу үшін «дәстүрлі дін» деген терминді қолданып жүрміз. Біреулер «дәстүрлі дін, дәстүрлі ислам» деген бола ма?» деп айтып жатады. Ислам – бір ғана ислам. Ол ешқашан бұзылған жоқ. Құран өзгерген жоқ. Қай жерде болмасын ислам – ислам болып қала береді. Бірақ біз оны қалай түсіндік? Біздің қазақи дүниетанымдағы исламдық көзқарастар қандай? Ғұламаларымыз дін туралы не айтты? Оның ішіндегі ең басты құндылық не? Міне, осы мәселелер тұрғысынан әр халықтың өзінің менталитеті, ерікті көзқарасы, ұстанымдары, рухани мұрасы бар. Рухани мұраны жаңғырту, рухани жаңғыру деген мәселе расында да өте өзекті болып отыр. Егер кімде-кім өзінің дәстүрлі құндылықтарынан сусындаған болса ол азамат теріс ағымдардың артынан еріп кете қоймайды. Қарны аш болса да, әлеуметтік жағынан қиналып жатса да экстремизмнің қатарын толтырып кетпейді. Өйткені ол сол құндылық арқылы өзін сақтап қалады. Біздің дәстүрлі дініміз, көзқарасымыз, соның ішіндегі ислам ғұламалары, жалпы қазақтың қандай ағартушысын алып қарамаңыз, барлығы дерлік медреселерден білім алып сусындағын. Алдыңғы әл-Фарабиден бастап, кешегі Абай, Шәкәрім, Мәшһүр-Жүсіптерге дейін, тіпті Алаш зиялыларының басым көпшілігі медреселерден білім алды. Олай болса, дәстүрлі дінді берік ұстанған, құндылықтарды сақтаған, әрине бұл жерде «дәстүрлі» деген сөз исламнан бөлек деп түсінбеу керек, біздің салт-дәстүрімізбен қабысқан, тіпті қазір дін деп айтудың өзі қиын. Қазір исламның құндылықтары біздің салт-дәстүрімізде бар. Оны бөле-жарудың өзі қиынға соғады. Соның мәнін түсініп, байыбына барып, тіпті керек болса рухани құндылықтар бойынша, әр халықтың өзінің рухани мұрасына байланысты тәрбие сағаттарын көбейтетін болса дейміз. Мектептерде балаларға «дінтану негіздері» деген сабақ оқытылып жатыр. Бірақ бұл жерде балаға қандай да бір бағыт-бағдар бере алмайды. Өйткені зайырлы қоғам болғаннан кейін қандай да бір діни құндылықтарды уағыздау ол зайырлылық қағидаларына қайшы келеді. Ондай жағдайда, мысалы қазақ салтының өзінің рухани мұрасын дәріптеуге құқымыз бар ғой. Қаншама зиялыларымыз, дін ғұламаларымыз бар. Солардың еңбектеріне негізделген рухани құндылықтар бойынша да тәрбие сағаттарын беру керек. Яғни жастардың, өскелең ұрпақтың бойына діни құндылықтарды дарытпайтын болсақ, онда олар ертең «ақиқатты» басқа жақтан іздейтін болады. Ал ол кезде оның көзқарасын бері қайтару – қиынның қиыны. Сондықтан «ел боламын десең бесігіңді түзе» демекші, жастардың осы көзқарастарын қалыптастыруға, рухани құндылықтары жандандыруға, ұлтымыздың мүддесіне қызмет ететін, ел ішінде бүлдіргі әрекеттерге бармайтын жастарды қалыптастыру үшін ең алдымен өзіміздің өткенімізді түгендеуіміз керек. Соны жүзеге асыру үшін телеарналардан, радиолардан әртүрлі бағдарламалар арқылы дәріптеп, әлеуметтік желілерде арнайы жобалар ұйымдастыру керек. Ең алдымен бізге рухани тыныштық қажет. Ал рухани тыныштық болмаған мемлекетте, бөлшек-бөлшек болған қоғамда елдің әл-ауқатын дұрыстау да мүмкін емес. Алтынмен аптап, күміспен қаптап қойсаңыз да адамның ішкі құндылығы қалыптаспайтын болса ол мемлекет бүлінуге дайын тұрады. Сондықтан осы құндылық, руханият деген түсінікті бірінші орынға шығаратын кез келді.
– Әңгімеңізге рахмет!
Әңгімелескен
Нұрлайым БАТЫР.